Artikulli me titull “Vriten tri motra, arrestohet një 20-vjeçar” është publikuar më 4 shtator nga portali informativ “Kosova-sot.info”.
Pas verifikimit të fakteve të kryer nga hibrid.info, rezulton që titulli nuk e bënë të qartë lajmin dhe vendndodhjen e kësaj ngjarje.
Kjo bëhet e qartë vetëm në përmbajtje, ku thuhet se “Një adoleshente dhe dy motrat e saj më të vogla janë vrarë pas një incidenti të dhunshëm në një shtëpi në Dublin”.
Duke ditur se ky portal është i regjistruar në Kosovë (shih këtu) dhe shumicën e lexuesve i ka shqipfolës (shih këtu), kjo mund t’i dezinformojë lexuesit se ngjarja ka ndodhur në vendin tonë.
Pjesë nga artikulli i publikuar në portalin “Kosova-sot.info”:
Një adoleshente dhe dy motrat e saj më të vogla janë vrarë pas një incidenti të dhunshëm në një shtëpi në Dublin.
Oficerët e policisë u thirrën në një pronë në zonën Tallaght të qytetit rreth orës 12:30 të së dielës.
Dy fëmijë dhe një adoleshente u dërguan me ambulancë në Children’s Health Ireland (CHI) në Crumlin, por të tre u shpallën të vdekur më vonë, shkruan Indepedent.
Vegëza e artikullit të publikuar në portalin “Kosova-sot.info”:
Analiza:
Në titullin e artikullit të publikuar nga “Kosova-sot.info” nuk bëhet e ditur se në cilin shtet janë vrarë tri motra. Ndërsa lajmi qartësohet vetëm në përmbajtje, ku bëhet e ditur se kjo ngjarje ka ndodhur në Dublin, kryeqytet i Republikës së Irlandës.
Ky portal informativ i cili vepron në Kosovë dhe lexuesit parësor i ka nga Kosova, bazuar në përcjellësit e faqes në Facebook. Prandaj, mosdhënia e informacioneve për vendin se për ku bëhet fjalë, ky lajm shumë lehtë mund t’i dezinformojë lexuesit e vet, duke i bërë të mendojnë se ngjarja ka ndodhur në shtetin tonë.
Bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.