Disa portale informative në gjuhën shqipe kanë publikuar dje (15 tetor) një artikull me pretendimin se shtëpia evropiane e futbollit “UEFA” ka përzgjedhur dy futbollistë shqiptarë në formacionin më të mirë në kualifikimet për kampionatin evropian “EURO 2024”.
Pas verifikimit të fakteve të kryer nga hibrid.info, është vërtetuar se UEFA nuk ka përzgjedhur formacionin më të mirë në këto eliminatore, por që kjo përzgjedhje është bërë nga një platformë e specializuar për rezultatet sportive në kohë reale “SofaScore.com”.
Vegëza e artikullit të publikuar në portalet “Albeu.com” dhe “Sot.com.al”:
Edhe pse në titull pretendohet se formacioni më i mirë është zgjedhur nga UEFA, në përmbajtje të artikullit të publikuar nga portalet e lartcekura specifikohet se përzgjedhja është bërë nga platforma “SofaScore.com”.
Në këtë formacion me 11 lojtarët më të mirë të raundit të 7-të të kualifikimeve për “EURO 2024” janë përzgjedhur portieri i Kombëtares së Shqipërisë, Etrit Berisha, si dhe sulmuesi i Përfaqësueses së Kosovës, Milot Rashica. (shih këtu)
Hibrid.info ka hulumtuar edhe në ueb-faqen zyrtare të UEFA-s, si dhe në faqen zyrtare të këtij institucioni në Facebook, por që nuk është gjetur ndonjë formacion i publikuar me më të mirët e këtij raundi kualifikues. (shih këtu dhe këtu)
Analiza:
Disa portale informative kanë publikuar një artikull me formacionin më të mirë të futbollistëve për raundin e 7-të të kualifikimeve për “EURO 2024” nga SofaScore.com, me pretendimin e pasaktë se i njëjti është përzgjedhur nga UEFA.
Bazuar në metodoligjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
