Portali i dyshimtë me përmbajtje në gjuhën shqipe “web3.lajme.icu” ka publikuar një artikull me pretendimin se nga muaji tetor do të ketë rritje të pensioneve.
Pas verifikimit të fakteve, hibrid.info ka vërtetuar se ky artikull është tërësisht i fabrikuar, i cili përmban titull dhe përmbajtje të rreme.
Hibrid.info pas hulumtimit të kryer përmes makinave online të kërkimit, ka arritur të vërtetoj se lajmi është i vjetër, i muajit mars, i publikuar nga portali informativ “Panorama.com.al” e që ka të bëjë me rritjen e pensioneve në Shqipëri nga muaji prill.
Pra, ky portal i dyshimtë ka marrë disa pjesë nga ky artikull i vjetër, të cilin e ka ndryshuar duke pretenduar se rritja e pensioneve do të fillojë nga muaji tetor.
Artikulli i publikuar nga portali i dyshimtë “web3.lajme.icu”:
Erdhi dita e Pensionisteve!!Nga TETORI u rritet pensioni..
Nga muaji qershor rritet pensioni, Ja sa eshte vlera e rritjes. Njoftime te mira per pensionistet Edi Rama e ka bërë realitet dhe prej muajit Tetor pensionet do të rriten me 3.3 për qind. Përmes kësaj skeme shtesa që do të përfitojnë pensionistët do të jetë nga 4 mijë lekë deri në 10 mijë lekë të vjetra në muaj.DUKE E HAP REK LAMEN ME POSHTE JU KENI MUNDESI TE LEXONI ME TEPER
Vegëza e artikullit të publikuar në portalin e dyshimtë “web3.lajme.icu”:
I njëjti artikull është shpërndarë edhe në Facebook nga faqja “33shi.com”, e cila numëron afër 50 mijë ndjekës. (shih këtu)
Nga hulumtimi i kryer përmes makinave online të kërkimit, hibrid.info ka arritur të gjejë artikullin autentik të publikuar në kohë reale (15 mars) nga mediumi online “Panorama.com.al”.
Analiza:
Portali i dyshimtë “web3.lajme.icu” ka publikuar një lajm të vjetër të muajit mars, që flet për rritjen e pensioneve në Shqipëri nga muaji prill.
Megjithatë, ky portal i dyshimtë është munduar ta paraqesë atë si aktual, duke i ndryshuar titullin dhe përmbajtjen me pretendimin e rremë se rritja e pensioneve do të nisë nga muaji tetor.
Bazuar në metodologjinë e punës, hibrid.info e vlerëson këtë artikull si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
