Faqja në Facebook me emrin “Lexo Sot” dje (17 gusht) ka publikuar një artikull me titull “E FUNDIT/ Shtohet prezenca e xhandarmërisë serbe në kufi me Kosovën duke e…”.
Hibrid.info ka verifikuar faktet dhe ka vërtetuar se ky artikull përmban titull të sajuar, i cili nuk i përgjigjet përmbajtjes, ndërsa lajmi është i vjetër (24 shkurt), atëkohë kur kryetari i Bashkësisë Lokale në fshatin e zonës kufitare Kosovë-Serbi, në Breznicë, komuna e Kamenicës, Nazim Hajdini, kishte njoftuar se shteti i Serbisë e ka shtuar prezencën ushtarake në këtë fshat.
Kjo faqe në Facebook e ka postuar këtë lajm të vjetër me pretendimin ta paraqes si aktual, duke i shtuar në titull cilësimin “E FUNDIT”, me pretekstin që të duket si lajm aktual.
Vegëza e artikullit të publikuar në Facebook nga faqja “Lexo Sot”:
“Lexo Sot” këtë artikull me titull të sajuar e ka marrë nga portali i dyshimtë me përmbajtje në gjuhën shqipe “news308media.com”, të publikuar më 24 shkurt 2022. (shih këtu)
Pas hulumtimit të kryer përmes makinave online të kërkimit, hibrid.info ka arritur të gjejë artikullin me njoftimin e kryetarit të Bashkësisë Lokale në Breznicë të bërë më 24 shkurt, e të publikuar në disa media onlinë në Kosovë. (shih këtu dhe këtu)
Ky artikull është shpërndarë edhe më herët nga faqja “Lexo Sot” në Facebook, e që gjithashtu është verifikuar nga hibrid.info. (shih këtu)
Analiza:
Faqja në Facebook me emrin “Lexo Sot”, dje (17 gusht) ka publikuar një artikull të muajit shkurt të këtij viti, me pretendimin ta paraqesë si aktual.
Pas analizës së kontrollit të fakteve, bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
