Disa portale informative në gjuhën shqipe kanë publikuar një artikull bashkangjitur me një video, me të cilin pretendohet se pamjet tregojnë momentin kur një foshnje e porsalindur nxirret e gjallë nga rrënojat pas tërmetit në Marok.
Kjo video me pretendim të njëjtë është shpërndarë edhe nga disa llogari në gjuhën angleze në mediat sociale Facebook dhe X (ish-Twitter), e cila është verifikuar nga kontrollues faktesh të Reuters. (shih këtu)
Pas këtij verifikimi të kryer nga Reuters, është vërtetuar se kjo ngjarje nuk ka ndodhur pas tërmetit të 8 shtatorit që goditi Marokun, por e njëjta tregon një foshnjë të shpëtuar nga një fushë në fshatin Moosa Nagar në qarkun Kanpur Dehat, Uttar Pradesh, Indi.
Vegëzat e artikullit të publikuar në portalet informative në gjuhën shqipe si “Telegrafi.com”, “Indeksonline.net” dhe “Shqiptarja.com”:
Reuters ka gjetur deklaratën e policisë në Kanpur Dehat, të publikuar në median sociale X (shih këtu), e cila tha se një çift që banonte në Moosa Nagar gjeti një fëmijë të parakohshëm në një fushë. Oficeri thotë se fëmija u dërgua me urgjencë në një institucion mjekësor aty pranë dhe është i shëndetshëm pas trajtimit.
Ky departament i policisë ka shpërndarë gjithashtu një video tjetër të foshnjës së shpëtuar. (shih këtu)
Analiza:
Disa portale në gjuhën shqipe kanë publikuar pa e verifikuar një video-material të një foshnje të porsalindur, e cila nxirret e gjallë nga dheu në një fushë në Indi.
Mirëpo, portalet e lartcekura kanë pretenduar se video-materiali paraqet një foshnje të shpëtuar pas tërmetit të 8 shtatorit që goditi Marokun. Ky artikull merr vlerësimin si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
