Shkroi: Etrit Rexhepi
Publikohet një video-material ku shfaqen pamje të një rruge, dhe në audion e saj dëgjohen zëra të ngritur nga disa persona. Videoja shoqërohet me mbishkrimin “Memli shan policët e Kosovës”.
Kjo përmbajtje me këtë pretendim është publikuar në TikTok nga një llogari me emrin “bubazhel”.
Cila është e vërteta?
Hibrid.info ka gjetur se bëhet fjalë për një video të vjetër, ku raportohej se Memli Krasniqi, kryetar i Partisë Demokratike të Kosovës (PDK) ishte përplasur verbalisht me dy zyrtarë të Policisë së Kosovës.
Publikuesi i këtij materiali në TikTok nuk ka specifikuar kohën e saktë të ndodhjes së ngjarjes, çka mund të çojë audiencën në besimin se bëhet fjalë për një ngjarje aktuale.
Duke qenë se video-materiali mban vulën e mediumit online “Insajderi.org”, hibrid.info ka hulumtuar dhe ka gjetur këtë video-material, bashkangjitur një artikulli me titullin “Dënojnë shoferin e tij, deputeti Memli Krasniqi u bërtet policëve”.
Ky lajm ishte publikuar në ueb-faqen e këtij mediumi, më 20 maj të vitit 2021.
Në kreun e këtij artikulli shkruan “Memli Krasniqi, deputeti i Kuvendit të Kosovës nga radhët Partisë Demokratike të Kosovës, është përplasur verbalisht mbrëmë me dy zyrtarë të Policisë së Kosovës. Krejt kjo pasi i dënuan shoferin, i cili kishte kaluar semaforin në të kuqen”.
Tutje brenda tekstit raportohet se Krasniqi dëgjohet duke kërcënuar policët me fjalët “A del ti nesër në punë”.
Analiza:
Publikohet një video-material që shfaq kryetarin aktual të PDK-së, Memli Krasniqi në një përplasje verbale me disa zyrtarë policorë të Kosovës.
Por, që ngjarja kishte ndodhur në vitin 2021, gjë e cila nuk sqarohet në publikim.
Bazuar në metodologjinë e punës, hibrid.info e vlerëson përmbajtjen si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.