Portali i dyshimtë në gjuhën shqipe “todaynews35.com”, ka publikuar një artikull me titull “Vlora Citakut i besohet pozita e Presidentës nga SHBA, mendimi juaj…??”.
Pas analizës së kontrollit të fakteve nga hibrid.info, ky lajm rezulton të jetë i vjetër, i publikuar më 17 nëntor 2020.
Gjithashtu, artikulli përmban titull të sajuar, i cili nuk përputhet me përmbajtjen, pasi në tekst nuk ka asnjë reagim zyrtar të SHBA-ve lidhur me pozitën e Presidentës, por është vetëm një mendim nga publicist Shkëlzen Maliqi, i cili besonte se SHBA-ja mund të insistojë që ta bëjë Vlora Çitakun presidente të Kosovës.
Teksti i artikullit të publikuar në portalin e dyshimtë “todaynews35.com”:
Vlora Citakut i besohet pozita e Presidentës nga SHBA, mendimi juaj…??
Publicisti i njohur, Shkëlzen Maliqi e konsideron se roli i Amerikes është me doemos ne te gjitha proceset që ndodhin në Kosove.
Ai beson se SHBA-ja mund ta ve në dukje rolin e saj edhe ne zgjedhjen e presidentit te ri në Kosovë, por edhe në vazhdimin e dialogut ndërmjet Kosoves dhe Serbise. Ai e beson se SHBA mund të insistoje qe ta bëjë Vlora Çitakun presidente të Kosovës.
Vegëza e artikullit të publikuar në portalin e dyshimtë “todaynews35.com”:
Më poshtë mund të gjeni vegëzat e artikullit autentik të publikuar në kohë reale nga disa media online.
Analiza:
Portali i dyshimtë “todaynews35.com” ka marrë një lajm të vjetër të cilit i ka vënë titull të sajuar, duke u munduar ta paraqesë atë si aktual. Pas verifikimit të kryer nga hibrid.info, del që ky artikull kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
