Shkroi: Festim Rizanaj
Sipas një pretendimi që po qarkullon në media, presidenti i Serbisë, Aleksandar Vuçiq, ka thënë se “Beogradi nuk është i gatshëm ta njohë pavarësinë e Kosovës”.
Kjo deklaratë thuhet se është bërë në një panel gjatë Forumit GLOBSEC, të premten (13 qershor) , i cili është duke u mbajtur në Pragë.
Pas verifikimit të fakteve nga hibrid.info, është gjetur se Vuçiq shprehimisht nuk ka deklaruar se “Beogradi nuk është i gatshëm ta njohë pavarësinë e Kosovës”.
Çka tha Vuçiq?
Presidenti i Serbisë, Aleksandar Vuçiq, gjatë fjalimit të tij në Forumin GLOBSEC në Pragë, foli për çështjen e Kosovës duke e paraqitur si një problem të pazgjidhur.
Në media është cituar të ketë thënë: “Bëhet fjalë për Kosovën. Siç e dini, ne i përmbahemi Kartës së Kombeve të Bashkuara dhe Rezolutës 1244, e cila thotë se Kosova është pjesë e Serbisë. Njëzet e dy nga 27 vendet anëtare të BE-së tashmë e kanë njohur pavarësinë e Kosovës, ndërsa pesë prej tyre jo – dhe ky është problemi. Beogradi nuk është i gatshëm ta njohë pavarësinë e Kosovës”. (këtu, këtu, këtu, këtu)
Pas verifikimit të deklaratës së publikuar në media, është konstatuar se pjesa e fundit e citimit — “Beogradi nuk është i gatshëm ta njohë pavarësinë e Kosovës” — nuk është thënë nga presidenti i Serbisë, por është formuluar nga moderatorja e panelit gjatë diskutimit në Forumin GLOBSEC në Pragë. (shiko këtu nga minuta e 12-të)
Pas ndërhyrjes së moderatores me shprehjen “Beogradi nuk është ende i gatshëm ta njohë pavarësinë e Kosovës?”, presidenti Vuçiq u përgjigj duke thënë: “Bratislava nuk është e gatshme ta njohë atë, Bukureshti nuk është gati, Athina nuk është gati, Madridi nuk është gati dhe Nikozia nuk është gati… dhe nuk është gati”.
Kjo tregon se deklarata e cituar gjerësisht në media shprehimisht nuk është bërë nga vetë Vuçiq, por përfaqëson një ndërhyrje në formë pyetëse të moderatores gjatë diskutimit.
Analiza:
Në media po qarkullon pretendimi se presidenti i Serbisë, Aleksandar Vuçiq, ka deklaruar në Forumin GLOBSEC se “Beogradi nuk është i gatshëm ta njohë pavarësinë e Kosovës”.
Megjithatë, pas verifikimit nga hibrid.info, u vërtetua se kjo fjali nuk është thënë shprehimisht nga Vuçiq, por ishte një formulim i moderatores së panelit.
Bazuar në metodologjinë e punës, hibrid.info, këtë pretendim e vlerëson si “përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.