Shkroi: Endrit Berisha
Zëvendëskryeministri i Serbisë, Aleksandar Vulin, ka pretenduar pa fakte se pranimi i mundshëm i Kosovës në Këshill të Evropës është kontribut për krijimin e asaj që ai e quan “Shqipëri e Madhe”.
Katër mediume në gjuhën serbe “kurir.rs”, “novosti.rs”, “telegraf.rs” dhe “politika.rs” kanë transmetuar një deklaratë të Vulinit sot (13 maj).
Çka tha Vulin, sipas raportimeve?
Të katër mediumet e lartëpërmendura kanë cituar deklaratën e njëjtë të Vulinit si kundërpërgjigje të vizitës së kryeministrit të Shqipërisë, Edi Rama, në Athinë të Greqisë të dielën. Duke e cilësuar si promovim të “Shqipërisë së Madhe”, Vulini, siç raportohet, ka thënë se atë “vetëm serbët dhe bota serbe mund ta ndalin, por edhe grekët”.
“Herën tjetër që Qeveria e Greqisë mendon për njohjen e të ashtuquajturës Kosovë, kujtojani se si dukej pritja e Edi Ramës në mes të Athinës. Atë që Rama nuk mund ta përjetojë në Tiranë, e përjetoi në Athinë. Njohja e të ashtuquajturës Kosovë nga autoritetet greke dhe pranimi i Prishtinës në Këshill të Evropës do të ishte kontribut i pamatshëm i Qeverisë së Greqisë dhe Dora Bakoyannis në krijimin e Shqipërisë së Madhe. Vetëm serbët dhe bota serbe mund ta ndalin atë, por edhe grekët, grekët tanë të dashur, mendojeni këtë”, ka thënë Vulini, sipas raportimit të “telegraf.rs”.
Vegëza e artikullit të “telegraf.rs”:
Screenshot nga artikulli i publikuar në Telegraf.rs
E njëjta përgjigje është publikuar edhe në tri mediumet tjera më pas. (shih këtu, këtu dhe këtu)
Për pretendimin e dhënë, Vulini nuk ofron asnjë fakt. E në fakt, pretendime të tilla zyrtarë të lartë të Serbisë për “Shqipërinë e Madhe” kanë dhënë edhe në të kaluarën, të cilat janë trajtuar nga hibrid.info. (shih këtu, këtu dhe këtu)
Kosova, si shtet, ka mbërritur në fazën e vendimit final për anëtarësim në Këshill të Evropës. Ka marrë mbështetjen në Asamblenë Parlamentare, e votimi është kushtëzuar në prag të mbledhejs së Komitetit të Ministrave. Greqia nuk e njeh shtetin e Kosovës. Raportuese për aplikimin e Kosovës në Asamblenë Parlamentare të Këshillit të Evropës ka qenë deputetja greke, Dora Bakoyannis.
Analiza:
Zëvendëskryeministri i Serbisë, Aleksandar Vulin, ka pretenduar se pranimi i mundshëm i Kosovës në Këshill të Evropës do të ishte kontribut për krijimin e “Shqipërisë së Madhe”. Një deklaratë e tillë nuk është e bazuar në fakte, dhe si e tillë nuk qëndron.
Bazuar në metodologjinë e punës, hibrid.info këtë artikull e vlerëson si “teori konspirative”.
Vlerësimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.