Shkroi: Etrit Rexhepi
Është publikuar një video-material, që shfaq momentin e arrestimit të një zyrtari të komunës së Gjilanit, i dyshuar për korrupsion.
Videoja është publikuar në disa llogari në TikTok me datë 12 dhe 13 maj, madje në njërën prej tyre pretendohet se i dyshuari, është i afërt me kryetarin aktual të Gjilanit, Alban Hysenin.
Por, pas verifikimit nga hibrid.info, është gjetur se bëhet fjalë për një ngjarje të ndodhur në vitin 2018.
Vegëza e video-materialit të publikuar nga llogaria “shqiperietnike3” në TikTok:
Të njëjtën, hibrid.info e ka gjetur të publikuar edhe në llogaritë “albialbiii4” dhe “infosot.com”, po ashtu në TikTok (shih këtu dhe këtu).
Faktet e gjetura nga hibrid.info tregojnë se videoja është rezultat i një storje të publikuar nga “kallxo.com”, në shtator të vitit 2018 (shih këtu), ku tregohet për arrestimin e një zyrtari në Komunën e Gjilanit, i dyshuar për ryshfet (këtu).
Ndërsa mbishkrimi që pretendon se i arrestuari është “krahu i djathtë i kryetarit të Gjilanit, Alban Hyseni”, është i pa verifikueshëm, pasi nga pamjet, nuk dihet identiteti i të arrestuarit.
Bazuar në faktin se më 3 maj, është gjetur i publikuar një artikull nga “insajderi.org’ me titull “Skandal- Krahu i djathtë i Alban Hysenit akuzohet për dhunë ndaj një të miture” (këtu), hibrid.info vlerëson se pretendimi është munduar të lidhet me këtë artikull.
Analiza:
Lajmi për arrestimin e një zyrtari komunal në Gjilan, të dyshuar për korrupsion, është i vjetër dhe pretendimi se i njëjti është “krahu i dathtë”, i Alban Hysenit, është i pa konifrmuar.
Rasti kishte ndodhur në vitin 2018 dhe identiteti i të dyshuarir, nuk dihet.
Bazuar në metodologjinë e punës, hibrid.info e vlerëson përmbajtjen si “Manipulim i fakteve”.
Arsyetimi:
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.