Disa faqe në Facebook kanë publikuar sot (6 prill) një artikull me titullin “Me rritjen e numrit të Shqipëtarëve në Gjermani, Gjermania po varfërohet”, të marr nga portali i dyshimtë “jnews3.com”, i publikuar me datë 4 shkurt.
Pas verifikimit të fakteve, hibrid.info ka vërtetuar artikulli është i vjetër dhe titulli është i sajuar, që nuk i përgjigjet përmbajtjes.
Lajmi qartësohet vetëm në përmbajtje ku shkruan se “Ndërsa shqiptarët vijojnë të rendin furishëm drejt Gjermanisë, ‘parajsës tokësore’ sipas një perceptimi që kanë krijuar e psikoze që i ka sunduar vitet e fundit, Gjermania vetë po shfaq shenja varfërie”.
Pra, me anë të këtij titulli, faqja e lartcekur ka lënë të kuptohet se shkak i varfërisë së Gjermanisë është shkuarja e numrit të madhe të shqiptarëve atje, përkundër faktit që në përmbajtje ceket arsyeja e varfërimit të Gjermanisë, e që është inflacioni.
Vegëza e artikullit të publikuar në Facebook nga faqet “Lajme Globale”, “Shqiperia Daily”, “Lajme nga Bota”:
Pas hulumtimit të kryer përmes makinave online të kërkimit, hibrid.info ka arritur të gjejë artikullin e publikuar me datë 19 tetor 2022 në portalin informativ në gjuhën shqipe “gazetaexpress.com”. (këtu)
Artikullit të publikuar nga “gazetaexpress.com” i është vënë titulli “Kosovarët e ëndërrojnë, por Gjermania po varfërohet”.
Analiza:
Disa faqe në Facebook kanë publikuar një artikull me pretendimin në titull se shkuarja e shqiptarëve në Gjermani, ka bërë që ky shtet të varfërohet.
Pas verifikimit të fakteve është gjetur se titulli është dezinformues dhe se përmbajtja tregon arsyen e varfërimit të Gjermanisë, e që është inflacioni e jo shkuarja e numrit të madh të shqiptarëve atje.
Bazuar në metodologjinë e punës, hibrid.info këtë artikull e vlerëson si “dezinformatë”.
Vlerësimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.