Portali informativ “Demokracia.com” ka publikuar sot (18 maj) një artikull me titull “DOKUMENT| Kryetari i Junikut blen veturë me km/h 00, vlera rreth 20 mijë euro”.
Mirëpo, pas verifikimit të fakteve të kryer nga hibrid.info, është vërtetuar se ajo që pretendohet në titull, nuk korrespondon me përmbajtjen.
Në përmbajtje, shpjegohet se vetura është blerë nga institucioni, në këtë rast Komuna e Junikut, e jo nga kryetari i saj Ruzhdi Shehu, siç pretendohet përmes titullit.
Gjithashtu, edhe në dokumentin e siguruar nga “Demokracia.com”, nuk figuron emri i kryetarit, por vetëm i Komunës së Junikut.
Pra, bazuar në këtë dokument, vetura nuk është blerë nga kryetari, por nga institucioni, e që në dosjen e tenderit është dhënë edhe arsyetimi se vetura është për nevojat e komunës.
Vegëza e artikullit të publikuar në portalin “Demokracia.com”:
Pjesë nga artikulli i publikuar në “Demokracia.com”:
DOKUMENT| Kryetari i Junikut blen veturë me km/h 00, vlera rreth 20 mijë euro
Komuna e Junikut ka nënshkruar një kontratë për blerjen e një veture të re.
Siç bëhet e ditur në kontratën e publikuar në KRPP, komuna e Junikut e udhëhequr nga Ruzhdi Shehu, ditë më parë ka shpallur një tender për blerjen e një veture për nevojat e kësaj komune. Procedurat për këtë blerje tashmë kanë përfunduar, ku edhe është nënshkruar kontrata me kompaninë fituese.
Në dosjen e këtij tenderi, qartësohet se vetura është blerë nga institucioni i lartcekur, dhe se e njëjta do të përdoret për nevojat e komunës. (shih këtu dokumentin e siguruar nga Demokracia.com)
Analiza:
“Demokracia.com” ka raportuar për një veturë të blerë nga Komuna e Junikut, por në titullin e këtij artikulli ka pretenduar se ajo është blerë nga kryetari i këtij institucioni, Ruzhdi Shehu.
Mirëpo, edhe në dosjen e këtij tenderi, si blerës figuron emri i Komunës së Junikut, e jo i kryetarit të saj, siç pretendohet përmes titullit.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.