Portali i dyshimtë “Specialja.com” ka publikuar një artikull me titull “Presidenti tregon se së shpejti do të shpallim gjendje të jashtëzakonshme në vend”.
Ky artikull është i vjetër, i cili ishte publikuar me datën 17 mars. Ky portal i dyshimtë ka përdorur një pjesë të tekstit nga përshkrimi i një video kur presidenti i vendit, Hashim Thaçi, kishte propozuar shpalljen e gjendjes së jashtëzakonshme në Kosovë si pasojë e pandemisë COVID-19. Ndërsa në artikullin e Specialja.com, ky lajm i vjetër është publikuar duke pretenduar që ta paraqes në kontekstin aktual.
Teksti i artikullit të publikuar në “Specialja.com”:
Presidenti tregon se së shpejti do të shpallim gjendje të jashtëzakonshme në vend
Presidenti i Republikës së Kosovës, Hashim Thaçi, i ka propozuar Kuvendit të Kosovës dekretin për gjendje të jashtëzakonshme në Kosovë.
Presidenti Thaçi ka njoftuar se pas mbledhjes me Këshillin e Sigurisë dhe pas konsultimin me kryeministrin e Kosovës, Albin Kurtin, propozoi dekretin për gjendje të jashtëzakonshme. Në këtë kohë, në rrethana të pa përjetuara në Kosovë dhe rajon / Ju ftojmë të hapni marketingun për pak sekonda dhe shfaqen pamjet ekskluzive
Vegëza e artikullit të publikuar në “Specialja.com”:
Më poshtë mund të shihni videon nga kanali zyrtar i televizionit ABC News në Youtube, kur presidenti Thaçi kishte propozuar shpalljen e gjendjes së jashtëzakonshme më 17 mars.
Analiza:
Portali i dyshimtë “Specialja.com” ka përdorur një lajm të vjetër, duke e ripublikuar dhe cilësuar atë si aktual. Ky shkrim kategorizohet si “Dezinformatë” dhe “Clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
