Portali i dyshimtë me përmbajtje në gjuhën shqipe “Timenews24hr.com” ka publikuar një artikull me titull “MADHESHTORE!! Albin Kurti Po E Dërgon Ushtrinë E Kosovës Në Ukrainë Për Të Iuftuar Kundër Rusisë”.
Pas analizës së kontrollit të fakteve të kryer nga Hibrid.info është vërtetuar se titulli është i sajuar dhe nuk përputhet me përmbajtjen.
Në tekst gjendet lajm i vjetër i publikuar më 9 dhjetor 2021 nga “Indeksonline.net”, ku thuhet se “Kryeministri Albin Kurti është shprehur i gatshëm të dërgojnë ushtarë të FSK-së në Ukrainë, nëse këtë gjë e kërkon NATO, pas konfliktit Ukrainë-Rusi”.
Pra, pretendimi se kryeministri i Kosovës Albin Kurti “po e dërgon ushtrinë në Ukrainë për të luftuar kundër Rusisë” është tërësisht i rremë.
Vegëza e artikullit të publikuar në “Timenews24hr.com”:
Ky artikull është shpërndarë edhe në Facebook nga faqja “Specialja.com”, e cila numëron afër 90 mijë ndjekës. (shih këtu)
Hibrid.info ka hulumtuar përmes makinave të kërkimit, ku është gjetur artikulli autentik i publikuar më 9 dhjetor nga portali “Indeksonline.net”, i cili edhe është cituar nga portali i dyshimtë “Timenews24hr.com”. (shih këtu)
Lajm i ngjashëm por me titull tjetër të sajuar është publikuar edhe më 22 dhjetor 2022 nga një portal tjetër i dyshimtë, të cilin gjithashtu e ka verifikuar stafi i Hibrid.info. (shih këtu)
Analiza:
“Timenews24hr.com” ka publikuar një artikull të vjetër të datës 9 dhjetor 2021, ku shkruan se kryeministri i Kosovës, Albin Kurti, është shprehur i gatshëm ta dërgojë FSK-në në Ukrainë, nëse ia kërkon NATO.
Por, këtij artikulli, ky portal i dyshimtë i ka vënë qëllimshëm titull të sajuar me pretendim të rremë se Kurti tashmë po e dërgon ushtrinë në Ukrainë për të luftuar kundër Rusisë.
Pas analizës së kontrollit të fakteve, hibrid.info e ka vlerësuar këtë artikull si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.