Portali “kosova-sot.info” ka publikuar një artikull me titull “Promovoi i pari terapinë me plazma kundër COVID-19, vetëvritet mjeku”.
Pas kontrollit të fakteve të kryer nga hibrid.info, rezulton që me këtë titull të vendosur, autori mund të ketë tendencë të dezinformimit të lexuesve, pasi që ngjarja vërehet se ka të bëjë me shtetin e Italisë, e një gjë e tillë nuk bëhet e ditur në titull.
Duke ditur se portali “kosova-sot.info” është në gjuhën shqipe dhe shumicën e lexuesve i ka kosovarë, përfshirë këtu edhe faktin që titulli i artikullit është përgjithësues, i cili nuk qartëson se ku ka ndodhur ngjarja, mund që shumë lehtë t’i dezinformojë lexuesit, duke i bërë të aludojnë se ngjarja të ketë ndodhur në Kosovë.
Gjithashtu, fotografia e artikullit nuk i përputhet përmbajtjes së tekstit, pasi në të shihet shiriti i policisë, në të cilin shkruan shqip “SKENE KRIMI MOS KALO”.
Pjesë nga teksti i artikullit të publikuar në “kosova-sot.info”:
Promovoi i pari terapinë me plazma kundër COVID-19, vetëvritet mjeku italian
Italia ka humbur një ndër mjekët më të mirë. Ish- pneumologu i spitalit të Mantovës, Giuseppe De Donno, është vetëvrarë në banesën e tij.
54-vjeçari ishte i pari që promovoi kurën ndaj Covid-19 përmes transfuzionit të plazmës hiperimune, terapia kontroverse që përdor një pjesë të gjakut të pacientëve që kanë kaluar koronavirusin.
Vegëza e artikullit të publikuar në “kosova-sot.info”:
Analiza:
Në titullin e këtij artikulli nuk bëhet e ditur se në cilin shtet ka ndodhur ngjarja. Duke pasur parasysh se ky portal është në gjuhën shqipe dhe shumicën e lexuesve i ka kosovarë, shumë lehtë mund t’i dezinformojë ata duke menduar se ngjarja ka të bëjë me Kosovën.
Gjithashtu, fotografia e vendosur në artikull, ka tendencë të dezinfomimit të lexuesve, pasi në të shihet shiriti i policisë, në të cilin shkruan shqip “SKENE KRIMI MOS KALO”. Pra, as titulli e as fotografia nuk i përgjigjen përmbajtjes në tekst, pasi nuk qartësohet se bëhet fjalë për ngjarje në Itali.
Pas analizës së kontrollit të fakteve përmes metodologjisë së punës, hibrid.info e velrëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
