Disa media në gjuhën shqipe kanë publikuar artikuj në lidhje me deklarimin e Fuad Ramiqit, të cilit iu kanë referuar si “imam”. Ramiqi, në një debat televiziv deklaroi se nuk e pranon kushtetutën e Kosovës, deklaratë kjo e cila u publikua si lajm nga disa media online, të cilat Ramiqit i dhanë epitetin imam.
Bazuar në hulumtimin e bërë nga hibrid.info, rezulton që Fuad Ramiqi nuk është imam.
Mediumet që Fuad Ramiqit i dhanë epitetin imam janë: “Dukagjini.com”, “Paparaci.com”, “Botasot.info”, “Gazetablic.com”, “Reporteri.net”, “Periskopi.com”.
Pretendimet e bëra nga media online se Fuad Ramiqi është imam, nuk qëndrojnë për faktin se ai nuk e ushtron një detyrë të tillë.
Në një intervistë për një medium në gjuhën shqipe Ramiqi thekson se merret me analiza mbi çështje të sigurisë. (këtu)
Për më tepër, sa i përket profesionalizmit të tij në platformën enciklopedike “Wikipedia” jepen detajet e shkollimit të tij. Bazuar në këtë, Ramiqi ka marrë shkollim në akademi ushtarake, ka qenë i angazhuar edhe në skenën politike, dhe nuk ceket që ka shërbyer si imam. (këtu)
Analiza:
Në disa media online, në lidhje me një deklaratë të bërë, Fuad Ramiqi është quajtur “imam”. Bazuar në hulumtimin e bërë del që Ramiqi nuk është dhe nuk ka shërbyer si imam. Ai ka një formim ushtarak dhe ka qenë i angazhuar në skenën politike, ndërsa sot merret me analiza të sigurisë.
Bazuar në metodologjinë e punës, hibrid.info e vlerëson këtë pretendim si “Gabim”.
Arsyetimi:
Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.