Llogaria në TikTok me emrin “kanalistat” ka publikuar dje (28 tetor) një video-material, që shfaq Albin Kurtin, kryeministrin e Kosovës.
Kryeministri Kurti degjohet teksa flet në gjuhën arabe, gjë të cilën e pretendon edhe mbishkrimi i vendosur video-materialit.
Por pas verifikimi nga hibrid.info është vërtetuar se në video-material është ndërhyrë me anë të Inteligjencës Artificiale (AI).
Vegëza e video-materialit të publikuar në TikTok nga llogaria “kanalistat”:
https://www.tiktok.com/@kanalistat/video/7294422873391910150
Deri në momentin e publikimit të këtij artikulli, ky postim ka arritur të grumbullojë afër 140 mijë shikime në TikTok. (shih fotografinë më poshtë)
Hibrid.info me anë të makinave të kërkimit, ka gjetur biografinë e kryeminisrit Kurti, në ueb-faqen zyrtare të “Zyrës së Kryeministrit”. (shih këtu)
Nga gjetjet bëhet e qartë që gjuhët të cilat i flet kryeministri Kurti janë: gjuha shqipe, angleze dhe serbo-kroate.
Ndërsa me anë të hulumtimit të kryer përmes programit të automatizuar “InVID”, hibrid.info ka gjetur videon e plotë të intervistës nga e cila ështe shkëputur video-materiali i publikuar nga llogaria në fjalë në TikTok. (shih këtu)
Në videon e plotë të kësaj interviste, kuptohet se intervistën e dhënë të këtij viti (20 shkurt) për “France 24”, Kurti e kishte realizuar në gjuhën angleze. Gjë e cila e vërteton ndërhyrjet e realizuara në videon origjinale, në postimin e publikuar nga llogaria “kanalistat”.
Analiza:
Pas verifikimit të fakteve të kryer nga hibrid.info është vërtetuar se llogaria në TikTok ka publikuar një video-material i krijuar me inteligjencë artificiale, në të cilën shihet Kurti duke folur në gjuhën arabe.
Këtë video-material, llogaria e lartcekur e ka paraqitur si reale.