Një llogari në median sociale Facebook ka publikuar një video-material në të cilin paraqitet presidenti i Ukrainës, Volodymyr Zelenskyy duke vallëzuar.
Kontrollues faktesh nga Reuters (këtu) e kanë trajtuar këtë përmbajtje, e cila ka rezultuar të jetë e montuar dhe se në videon origjinale paraqitet një valltar rus.
Pra, autori ka ndërhyrë në videon origjinale, duke e zëvendësuar fytyrën e balerinit rus me atë të presidentit ukrainas.
Vegëza e video-materialit të publikuar në Facebook nga llogaria “Erion Dreshaj”:
Video origjinale është gjetur në median sociale “TikTok” e publikuar me datë 1 dhjetor 2022 nga vetë protagonisti i saj, balerini rus Vusal Mekhtiyev. (shih këtu)
Mekhtiyev ka sqaruar për Reuters se videoja ku paraqitet ai duke vallëzuar, është autentike. (shih këtu)
Hibrid.info ka vendosur ta trajtojë këtë përmbajtje, për arsyen se e njëjta është publikuar në gjuhën shqipe.
Analiza:
Video që shfaq presidentin ukrainas, Volodymyr Zelenskyy duke vallëzuar, është e montuar, pasi që në videon origjinale shfaqet balerini rus Vusal Mekhtiyev.
Autori ka zëvendësuar fytyrën e balerinit rus me atë të presidentit ukrainas. Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.