Facebook bënë të ditur se do të fillojë të heqë pretendimet e rreme në lidhje me vaksinat Covid-19 për të parandaluar “dëmtimin e afërt fizik”.
Nga kjo kompani kanë njoftuar se po i përshpejtojnë planet për ndalimin informacioneve mashtruese dhe të rreme në platformat e saj si Facebook dhe Instagram. Strategjia e kësaj kompanie është përshpejtuar duke parë shtimin e lajmeve të rreme rreth kësaj vaksine, pas njoftimit për miratim të përdorimit të vaksinës së parë në Mbretërinë e Bashkuar.
Ndër pretendimet që nuk do të lejohen të shpërndahen janë gënjeshtrat në lidhje me përbërësit e vaksinës, sigurinë, efektivitetin dhe efektet anësore.
Gjithashtu do të ndalohen edhe teoritë e rreme e të konspiracionit, që janë shpërndarë për një kohë të gjatë, të cilat pretendojnë se vaksinat e koronavirusit do të përmbajnë një mikro-çip për të kontrolluar ose monitoruar pacientët.
Çfarë thuhet në njoftimin e Facebook?
Në këtë njoftim, siç raporton BBC, thuhet se do të largohen të gjitha pretendimet e rreme lidhur me vaksinat e Covid-19 “të cilat janë demantuar nga ekspertët e shëndetit publik”.
Facebook bënë të ditur se që nga Janari, është larguar një sasi e madhe e përmbajtjes rreth pandemisë siç janë kurimet dhe trajtimet e rreme mjekësore, apo pretendimet e rreme që thonë se virusi nuk ekziston.
Në tetor, janë ndalur edhe reklamat që dekurajojnë njerëzit të marrin vaksinën. Kjo është si vazhdimësi e politikës së “largimit të dezinformimit rreth virusit që mund të shkaktojë dëmtim fizik”, thuhet në njoftimin e kësaj kompanie.
“Këtu përfshihen pretendime të rreme rreth sigurisë, efikasitetit, përbërësve apo edhe efekteve anësore të vaksinës dhe pretendimeve të rreme që thonë se vaksinat e Covid-19 përbëhen nga mikro-çipa dhe të ngjashme”.
“Ne gjithashtu do të largojmë teoritë konspirative rreth vaksinave të Covid-19, të cilat tashmë dihen se janë pretendime të rreme”.
Nevoja për të reaguar shpejtë ndaj këtyre pretendimeve të rreme, është shtua kryesisht pas njoftimeve për zbulimin e vaksinave nga disa kompani në Evropë dhe SHBA.
