Faqja “Gazeta Plisi” në Facebook ka postuar një fotografi nga një tubim i LDK-së në Piranë të Prizrenit, të cilës i kanë vënë mbishkrimin “Tubimi i LDK-së Musafir nderi Goran Rakiq”.
Pas verifikimit të kryer nga hibrid.info, është konstatuar se fotografia e postuar nga “Gazeta Plisi” është foto-montazh. Në këtë fotografi vërehet se është bërë ndërhyrje, përmes së cilës është vendosur imazhi i liderit të Listës Serbe, Goran Rakiq, në vend të një zyrtari të LDK-së.
Vegëza e postimit të faqes “Gazeta Plisi” në Facebook:
https://www.facebook.com/GPlisi/posts/302155948009669
Pas kërkimit dhe hulumtimit nga hibrid.info, del që kjo fotografi është marrë nga profili zyrtar i Driton Selmanajt në Facebook, nga tubimi i LDK-së në Piranë të Prizrenit, e postuar më 23 janar të këtij viti.
Në postimin e Selmanajt në Facebook shihet qartë se nuk bëhet fjalë për prezencën e Rakiqit në këtë tubim, siç pretendohet në përshkrimin e “Gazeta Plisi”, por kandidati i LDK-së për deputet nga Prizreni – Valdet Hoxha.
Vegëza e postimit të Driton Selmanajt në profilin e tij zyrtar në Facebook:
https://www.facebook.com/driton.a.selmanaj/posts/905113366693433
Analiza:
Faqja “Gazeta Plisi” në Facebook ka përdorur një fotografi nga tubimi i LDK-së në Piranë, në të cilën më pas e kanë ndërhyrë, duke larguar fytyrën e një anëtari të kësaj partie, për ta zëvendësuar me fytyrën e Goran Rakiçit.
Kjo faqe e cila numëron mbi 40 mijë pëlqime, me këtë foto-montazh të qëllimshme ka mashtruar lexuesit e saj. Pas verifikimit nga hibrid.info, del që ky postim kategorizohet si “mashtrim”.
