Shkroi: Fatbardh Dema
Është publikuar një fotografi ku shihet një tank, e shoqëruar me mbishkrimin: “Ushtria e fuqishme e Shqipërisë në Europe Defender 2025”.
Ky postim u publikuar me 31 maj në X (ish-Twitter) nga llogaria në gjuhën shqipe “Brerore”.
E vërteta?
Pas verifikimit të fakteve të kryer nga hibrid.info, u vërtetua se tanku është rus dhe fotografia është e vjetër, e publikuar në vitin 2015.
Pas hulumtimit të kryer përmes programit të automatizuar “InVID”, kjo fotografi u gjet e publikuar në mediumin britanik “DailyMail.co.uk” në qershor 2015. Në përshkrimin e imazhit, sqarohet se ky tank rus quhet T-14 Armata dhe fotografia u realizua në paradën e Ditës së Fitores në maj 2015. (shih fotografinë më poshtë)
Screenshot nga artikulli i publikuar në DailyMail.co.uk
Pak kontekst
Stërvitja më e madhe ushtarake në Evropë, “Defender Europe 2025” nisi më 25 maj me pjesëmarrjen e mbi 25,000 ushtarëve nga 29 shtete aleate dhe partnere të NATO-s. Kosova dhe Shqipëria janë mikpritëse të këtij ushtrimi madhor, i cili do të zhvillohet deri më 6 qershor. (këtu)
Analiza:
Një fotografi e një tanku u shpërnda në X me pretendimin se i përket ushtrisë shqiptare në stërvitjen “Europe Defender 2025”.
Pas verifikimit të fakteve, u vërtetua se fotografia paraqet tankun rus T-14 Armata dhe u realizua në Moskë më 2015.
Bazuar në metodologjinë e punës, hibrid.info e vlerëson këtë pretendim si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.
