Në TikTok është publikuar një imazh ku paraqitet kryeministri i Kosovës, Albin Kurti, duke mbajtur në duar një flamur kuq e zi. Në qendër të flamurit shfaqet një pjesë e shqiponjës dykrenare dhe harta e Kosovës.
Në përshkrimin e këtij imazhi pretendohet se bëhet fjalë për flamurin e ri të Kosovës që pritet të përdoret në të ardhmen e afërt.
“ALBIN KURTI PREZANTON FLAMURIN E RI QE PRITET TA KETE KOSOVA NE TE ARDHMEN E AFERTE”, shkruhet në përshkrim.
Çka nuk shkon me këtë përmbajtje?
Pas verifikimit u vërtetua se imazhi nuk është real, u gjenerua përmes inteligjencës artificiale.
Imazhi është verifikuar përmes Hive Moderation dhe rezultati tregon 98.5% probabilitet se është krijuar me inteligjencë artificiale. Platforma e identifikon gjithashtu “Gemini” si modelin e përdorur për gjenerimin e imazhit.
Pretendimi se bëhet fjalë për një fotografi reale të kryeministrit Albin Kurti duke prezantuar një flamur të ri të Kosovës nuk mbështetet nga ndonjë njoftim apo dokument zyrtar i publikuar nga institucionet e Kosovës.
Për më tepër, Kushtetuta e Republikës së Kosovës përcakton në nenin 6 se flamuri, stema dhe himni janë simbolet shtetërore të Republikës së Kosovës. Kushtetuta përcakton gjithashtu se pamja, mënyra e përdorimit dhe mbrojtja e flamurit rregullohen me ligj (shih këtu).
Kjo rregullohet më konkretisht me Ligjin Nr. 03/L-038 për Përdorimin e Simboleve Shtetërore të Kosovës. Neni 2 i këtij ligji përcakton se flamuri, stema dhe himni janë simbolet shtetërore të Kosovës, ndërsa neni 3.1 përcakton se forma dhe përmasat e flamurit dhe stemës përcaktohen nga Kuvendi i Republikës së Kosovës (shih këtu).
Analiza
Një imazh i gjeneruar me inteligjencë artificiale paraqitet në TikTok si fotografi e kryeministrit Albin Kurti duke prezantuar një flamur të ri të Kosovës.
Verifikimi përmes Hive Moderation e vlerëson imazhin me 98.5% probabilitet si të gjeneruar me IA, ndërsa nuk është gjetur ndonjë dëshmi zyrtare për prezantimin apo ndryshimin e flamurit të Kosovës.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.