Shkroi: Etrit Rexhepi
Është publikuar një fotografi ku shihen Vjosa Osmani, presidentja e Kosovës dhe Ahmed al Sharaa, president i Sirisë, me mbishkrimin që pretendon se ky shtet ka njohur pavarësinë e Kosovës.
Ky imazh me këtë pretendim është publikuar (12 prill) në TikTok nga një llogari me emrin, “ballkankosova.net2”.
A qëndron pretendimi?
Hibrid.info ka gjetur se nuk vendim zyrtar nga Siria për njohjen e Kosovës si shtet.
Deri në momentin e trajtimit, kjo përmbajtje ka pasur mbi 100 mijë shikime.
Pavarësinë e Kosovës deri më tani e kanë njohur 119 shtete, ndërsa Siria nuk figuron në mesin e këtyre vendeve (shih këtu).
Shteti që njohu së fundmi Kosovën shtet, është Sudani.
Konfirmimin për këtë njohje e dha Presidentja Vjosa Osmani (këtu), e cila qëndroi në Turqi javën e kaluar, ku ishte e pranishme në Forumin Diplomatik të Antalias dhe zhvilloi takime me liderë të vendeve të ndryshme (shih këtu).
Hibrid.info gjeti se në mesin e liderëve të cilët i takoi Osmani, është edhe Ahmed al Sharaa, president i Sirisë.
Osmani publikoi momentin e këtij takimi me anë të një fotografie, në llogarinë e saj në Facebook (shih këtu).
Postimi i Vjosa Osmanit në Facebook:
“Populli i Kosovës dhe populli i Sirisë kanë përjetuar vuajtje të panumërta nga regjime diktatoriale e gjenocidale, në luftën e tyre për të qenë të lirë.
Sot, me Presidentin e Sirisë së lirë, z. Ahmed al Sharaa, kishim takimin tonë të parë për të hapur kapituj të ri bashkëpunimi ndërmjet dy vendeve tona.
Kosova dhe Siria ndajnë plagë të njëjta: dhimbjen e luftës, shpërnguljen, e sfidat e rindërtimit, ndaj Kosova është e gatshme ta ndajë përvojën e saj në ndërtimin e institucioneve demokratike.”
Edhe pse Presidenca e Sirisë në postimin në platformën “X”, iu referuan Osmanit si presidente e Republikës së Kosovës, në këto njoftime të takimit, nga asnjëra palë nuk u konfirmua se Siria ka njohur Kosovën (shih këtu).
Njoftimi i Presidencës siriane:
“Presidenti i Republikës Arabe të Sirisë, z. Ahmad Al-Shara, dhe Shkëlqesia e Tij, Ministri i Punëve të Jashtme, z. Asaad Al-Shaibani, u takuan me Presidenten e Republikës së Kosovës, znj. Vjosa Osmani, në margjinat e Forumit Diplomatik të Antalias.”
Analiza:
Pretendimi se Siria ka njohur pavarësinë e Kosovës, nuk qëndron.
Presidentja Vjosa Osmani u takua me presidentin e Sirisë, por në këtë takim nuk pati konfirmim për njohje.
Bazuar në metodologjinë e punës, hibrid.info e vlerëson si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.