Në rrjetet sociale është shpërndarë një artikull me titull “Lul Raka: Do të vaksinohen të gjithë qytetarët në këtë muaj, kush refuzon dënim 5000 euro”. Ky lajm vjen nga një “portal” i dyshimtë, i quajtur valetal.info. Ndërsa mediumi të cilit i referohet valetal.info (RTV Dukagjini) nuk e përmend gjobën në rast të mos vaksinimit nga qytetarët.
Lajmi i plotë i publikuar nga valetal.info:
Lul Raka: Do të vaksionohen të gjithë qytetarët në këtë muaj, kush refuzon dënim 5000 euro?
Gripi sezonal që zakonisht paraqitet në muajt tetor, nëntor dhe dhjetor mund ta përkeqësojë situatën me korona në Kosovë.Mikrobiologu Lul Raka në një intervistë për RTV Dukagjinin thotë se është e nevojshme që këtë vit të vaksinohen rreth 500 mijë qytetarë.
“Këtë vit në të njëjtën kohë do t’i kemi dy armiq. Ju ftojmë që ta hapni marketingun për 5 sekonda dhe shfaqen pamjet ekskluzive!
Vegëza e artikullit të publikuar:
Në intervistën e dhënë për RTV Dukagjini, epidemiologu Lul Raka ka folur rreth vaksinimit të qytetarëve për gripin sezonal, ndërsa asnjëherë nuk ka përmendur dënimin prej 5 mijë eurosh në rast të mos vaksinimit.
Teksti i plotë i publikuar në RTV Dukagjini dhe Telegrafi.com:
Raka: Para tetorit, planifikohen të vaksinohen 500 mijë qytetarë të Kosovës
Gripi sezonal që zakonisht paraqitet nga muajt tetor, nëntor dhe dhjetor mund të përkeqësoj situatën me COVID-19 në Kosovë.
Mikrobiologu Lul Raka në një intervistë për RTV Dukagjinin thotë se është e nevojshme që këtë vit të vaksinohen rreth 500 mijë qytetarë.
“Këtë vit të njëjtën kohë do t’i kemi dy armiq. Normal që është më vështirë të luftojmë me dy armiq në të njëjtën kohë sepse edhe gripi sezonal do t’i konsumojë kapacitet spitalore pasi do të ketë njerëz të hospitalizuar edhe nga gripi”, deklaroi Lul Raka.
Sipas mikrobiologut, qëndrimi në ambiente të mbyllura do të jetë problem pasi shton mundësinë e përhapjes së gripit.
“Pikërisht për këtë arsye është kërkuar që të sigurohen 500 mijë vaksina. Me sa e di OBSH-ja tashmë ka siguruar 120 mijë vaksina për Kosovën, mirëpo pjesa tjetër do të sigurohet nga Ministria e Shëndetësisë. Tenderi me sa e di unë tashmë është shpallur. Me këto vaksina do të ketë më shumë njerëz të imunizuar sepse kur e ke mundësinë të parandalojmë gripin me vaksinë pse mos ta bëjmë një gjë të tillë. Marrja e vaksinave sigurisht se do të ndikojë në uljen e numrit të rasteve me grip sezonal”.
Duke folur për coronavirusin Raka thotë se parandalimi më i mirë është respektimi i rekomandimeve të institucioneve shëndetësore.
Vegëza e artikullit të publikuar në RTV Dukagjini dhe Telegrafi.com:
https://telegrafi.com/raka-para-tetorit-planifikohen-te-vaksinohen-500-mije-qytetare-te-kosoves/
Analizë:
Në bazë të një analize të fakteve të paraqitura nga ky artikull, hibrid.info ka vlerësuar se titulli nuk përkon fare me përmbajtjen dhe ka shtrembërim dhe ndryshim të faktit. Ky tekst hyn në kategoritë lajm i rremë, dezinformatë dhe ‘clickbait’.
Arsyetimi:
Lajm i rremë – Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
