Portali i dyshimtë me përmbajtje në gjuhën shqipe “GazetaNewborn.info” ka publikuar më 11 nëntor një artikull me pretendimin se Zyrtarëve të Lëvizjes Vetëvendosje iu ndalua të pajisen me “ESTA”.
Ky portal i dyshimtë ka pretenduar se sistemi elektronik “ESTA”, që verifikon personat para se të hyjnë në Amerikë, me sa duket ia ka pamundësuar zyrtarëve të VV-së shkuarjen në SHBA.
Autori i kësaj përmbajtje mund të ketë aluduar se bëhet fjalë për ministrat Albulena Haxhiu dhe Xhelal Sveçla, si dhe kryetarin e komunës së Podujevës, Shpejtim Bulliqi, të cilëve para disa ditësh SHBA-të ia anuluan vizitën. (shih këtu)
Hibrid.info pas hulumtimit të kryer përmes makinave online të kërkimit, nuk ka arritur të gjejë ndonjë emër tjetër që vjen nga radhët e LVV-së, e të cilëve u është refuzuar vizita në SHBA, duke lënë të nënkuptohet se autori i këtij artikulli i është referuar personave të lartcekur.
Mirëpo, ky pretendim i këtij portali të dyshimtë nuk qëndron. Pas hulumtimit të kryer nga hibrid.info në ueb-faqen zyrtare të doganës dhe kufijve në Shtetet e Bashkuara të Amerikës “cbp.gov”, bëhet e ditur se për aplikim për ESTA duhet të bëjnë shtetasit e vendeve që tashmë kanë liberalizim të vizave me SHBA-të, e që në këtë listë nuk është Kosova. (shih këtu)
Artikulli i publikuar në portalin e dyshimtë “GazetaNewborn.info”:
Zyrtarëve të VV-së që iu pamundësua vizita në Amerikë, ndonëse ishin të paralajmëruar është pamundësuar nga sistemi i autorizuar elekztonik i udhëtimeve që njihet si “ESTA”.
Sipas këtij sistemi në Amerikë, nuk mund të futën personat që kanë ndalim në këtë shtet për arsye të ndryshme.
ESTA është sistem elektronik, që verifikon personat para se të hyjnë në Amerikë, qoftë përmes aeroporteve, qoftë përmes kufirit.
Dhe me sa duket është pikërisht ky sistem që ia ka pamundësuar zyrtarëve të VV-së shkuarjen në Amerikë.
Ndryshe në Amerikë ka shkuar Behgjet Pacolli që do të marr pjesë në dasmën e vajzës së ish-Presidentit Trump, liderët e opozitës, Krasniqi e Abdixhiku poashtu do të shkojnë këtë muaj në Amerikë për takime zyrtare./Gazeta NewBorn/
Vegëza e artikullit të publikuar në portalin e dyshimtë “GazetaNewborn.info”:
Programi i heqjes së vizave (VWP) vlen për disa shtete, qytetarët e të cilave pasi vendosin të shkojnë në SHBA duhet të aplikojnë për ESTA. (shih më poshtë listën e shteteve VWP në gjuhën shqipe)
Në sqarimin e bërë në këtë ueb faqe se kush duhet të aplikojë për ESTA, thuhet “Të gjithë shtetasit ose shtetasit e kualifikuar të vendeve të VWP që planifikojnë të udhëtojnë në Shtetet e Bashkuara për biznes ose kënaqësi të përkohshme nën VWP, u kërkohet të marrin një autorizim përmes ESTA-s përpara se të hipin në një aeroplan ose anije me destinacion SHBA.
Ministrja e Drejtësisë, Albulena Haxhiu përmes llogarisë zyrtare në Facebook kishte demantuar lajmet se asaj i është refuzuar viza amerikane. (shih këtu)
Duke u bazuar në reagimin e Haxhiut, që lë të nënkuptohet se ajo është e pajisur me vizë amerikane, në ueb-faqen zyrtare të doganës dhe kufijve në Shtetet e Bashkuara të Amerikës, thuhet se “Individët që kanë një vizë të vlefshme do të jenë ende në gjendje të udhëtojnë në Shtetet e Bashkuara me atë vizë për qëllimin për të cilin është lëshuar. Individëve që udhëtojnë me viza të vlefshme nuk u kërkohet të aplikojnë për një autorizim ESTA”. (shih fotografinë më poshtë të përkthyer në shqip)
Analiza:
Portali i dyshimtë “GazetaNewborn.info” ka publikuar një artikull me pretendimin se zyrtarëve të Lëvizjes Vetëvendosje iu ndaluan të pajisen me ESTA, i cili është një sistem që verifikon personat para se të hyjnë në Amerikë.
Mirëpo, kjo nuk është e vërtetë, pasi vetëm shtetet që kanë liberalizim vizash me SHBA-të duhet të aplikojnë në ESTA, e që në këtë listë nuk gjendet Kosova.
Gjithashtu, në ueb-faqen zyrtare të doganës dhe kufijve në Shtetet e Bashkuara të Amerikës, thuhet se individët që udhëtojnë me viza të vlefshme nuk u kërkohet që të aplikojnë për një autorizim “ESTA”.
Bazuar në metodologjinë e punës, hibrid.info e vlerëson artikullin e publikuar nga “GazetaNeëborn.info” si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
