Presidenti i partisë “Aleanca Kosova e Re” (AKR), Behgjet Pacolli, ka pretenduar gabim se Mali i Zi u bë pjesë e iniciativës së Ballkanit të Hapur, në takimin (samitin) e Ohrit.
Ai këtë pretendim e ka bërë dje (8 qershor), përmes një statusi të publikuar në profilin e tij zyrtar në Facebook.
Pacolli e nis statusin e tij kështu:
“Sot në Ohër edhe Mali i Zi u bë pjesë e Open Balkan, ndërsa edhe Bosnja ishte aty në cilësinë e vëzhguesit”.
Vegëza e postimit të Behgjet Pacollit në profilin e tij në Facebook:
https://www.facebook.com/behgjeti/posts/558054209016808
Pra, Pacolli pretendoi se gjatë takimit të liderëve të Ballkanit Perëndimor në Ohër, Mali i Zi u bë pjesë e nismës së Ballkanit të Hapur, ndërsa Bosnja e Hercegovina ishte vetëm në cilësinë e vëzhguesit.
Mai i Zi ka qenë pjesë e këtij samiti, përmes prezencës së kryeministrit Dritan Abazoviq, por nuk është pjesë edhe e iniciativës, siç pretendon Pacolli. Në fakt, ka qenë vetë kryeministri Abazoviq që e ka bërë të qartë se nuk do të ketë anëtarësim në Ballkanin e Hapur gjatë ngjarjes së organizuar në Ohër.
Abazoviq, para nisjes, përmes postimeve në median sociale në “Twitter” e ka bërë të qartë arsyen e vizitës së tij në Ohër. Ai ka thënë kjo vizitë do të shërbejë për takime me partnerët strategjik dhe për të ndarë me ta shembullin e Mali të Zi në rrugën e integrimit në BE.
“Ballkani Perëndimor ka një vend në #BE????????. #MNE???????? si lider në integrim është gati të jetë shembull pozitiv në këtë proces”.
Ndërsa në postimet në median tjetër sociale “Telegram”, Abazoviq ka thënë se Mali i Zi nuk do të bëhet pjesë e Ballkanit të Hapur, në takimin në Ohër. (shih foton pasuese)
Pretendimi i bërë nga Pacolli se Mali i Zi u bë pjesë e kësaj iniciative në samitin e Ohrit, ndërsa Bosnja e Hercegovina ishte në cilësi vëzhguesi, bie ndesh edhe më një deklaratë të vet kryeministrit Abazoviq. Ai më 30 maj në mediumin publik të këtij shteti “RTCG” (këtu), kishte thënë se në samitin e Ballkanit të Hapur do të merr pjesë vetëm si vëzhgues.
“Ne nuk shkojmë në Ohër për t’u emëruar anëtar të Open Balkans. Ne po shkojmë si vëzhgues, do të shqyrtojmë se çfarë është e mirë për vendin, nëse del e mirë, nuk kam asgjë kundër bashkimit me nismën”.
Një pretendim i ngjashëm është bërë edhe gjatë ditës së organizimit të këtij samiti nga disa media në gjuhën shqipe, të trajtuara nga hibrid.info (këtu).
Analiza:
Pretendimi i bërë nga Behgjet Pacolli se në samitin e Ohrit, Mali i Zi u bë pjesë e Ballkanit të Hapur ndërsa Bosnja e Hercegovina ishte në cilësinë e vëzhguesit, rezulton të jetë i pavërtetë.
Sipas analizës së fakteve të kontrolluara, rezulton se dy shtetet, si Mali i Zi ashtu edhe Bosnje e Hercegovina ishin në cilësinë e vëzhguesit.
Ndërsa gjatë këtij samiti, nuk ishte bërë ndonjë anëtarësim i ri, përveç marrëveshjeve të tri shteteve që janë anëtare ekzistuese (Serbi, Maqedoni e Veriut, Shqipëri). (shih këtu)
Sipas këtij kontrolli të fakteve, pretendimi i Behgjet Pacollit vlerësohet si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.