Portali i dyshimtë me përmbajtje në gjuhën shqipe “web.news72post.com” ka publikuar një artikull me titull “Do t’i marrin pensionistët edhe nga 100 € shtesa për muajin Qershor”.
Hibrid.info ka verifikuar faktet në këtë artikull, i cili rezulton të jetë komplet i sajuar.
Edhe pas hulumtimit të kryer përmes makinave online të kërkimit si dhe rrjeteve sociale, hibrid.info nuk ka arritur të gjejë asnjë artikull me përmbajtje të tillë.
Po ashtu, në përmbajtje të këtij artikulli pretendohet rrejshëm se aplikimi për, siç i quajnë shtesa, mund të bëhet përmes klikimit në një hapësirë reklamuese.
Vegëza e artikullit të publikuar në portalin e dyshimtë “web.news72post.com”:
Ky artikull me titull dhe përmbajtje të sajuar është shpërndarë edhe në Facebook nga faqja “Gazeta Shqip”, e cila në këtë postim ka arritur të grumbullojë qindra reagime. (shih këtu)
Kjo nuk është hera e parë që një artikull i tillë publikohet nga portale të dyshimta. Me datën 13 prill të këtij viti, një portal tjetër i dyshimtë ka publikuar të njëjtin artikull, por me pretendimin e rremë se pensionistët do të përfitojnë nga 100 euro shtesa për muajin maj.
Edhe ky artikull është verifikuar nga stafi i hibrid.info, vegëzën e të cilit e gjeni këtu.
Analiza:
Portali i dyshimtë “web.news72post.com” ka publikuar një lajm të rremë me pretendimin që pensionistët e Kosovës do të përfitojnë 100 euro në muajin qershor.
Pas verifikimit të fakteve, hibrid.info ka vërtetuar se lajmi është komplet i fabrikuar, i cili nuk është gjetur në asnjë medium kredibil në Kosovë.
Bazuar në metodologjinë e punës, hibrid.info e ka vlerësuar këtë artikull si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.