Në disa media është publikuar një artikull me titull “Intelektuali nga Drenoci i bashkohet VV-së”.
Në këtë artikull thuhet se ish kandidati i pavarur për kryetar të Malishevës, Nexhat Krasniqi i është bashkuar Lëvizjes Vetëvendosje, duke iu referuar një fotografie që po qarkullon në rrjete sociale, ku shihet Krasniqi së bashku me liderin e Vetëvendosjes, Albin Kurtin.
Pas verifikimit dhe hulumtimit të kryer nga hibrid.info përmes makinave të kërkimit dhe rrjeteve sociale, është vërtetuar se pretendimi për aderimin e Krasniqit në Vetëvendosje është i pasaktë.
Ky artikull është publikuar së pari nga portali “reporteri.net” dhe shpërndarë nga disa media tjera online.
Teksti i artikullit të publikuar në reporteri.net:
Intelektuali nga Drenoci i bashkohet VV-së
Nexhat Krasniqi, ish-kandidat për kryetar të Malishevës njëherësh mësimdhënës i historisë i është bashkuar Vetëvendosjes.Të gjithëve ju kujtohet intelektuali nga Drenovci i cili u bë i famshëm për deklaratën e tij që ankohej pse nuk kishte asnjë kandidat nha Drenovci, ku e tëra Kosova mësoi për Drenocin, Astrazubin, Pagarushën ,Lladrovcin, Bellanicën e Kievën. Në një fotografi që po qarkullon në rjetet sociale ai shihet afër liderit të Lëvizjes Vetëvendosje, Albin Kurti.
Ai ka thënë se Drenovci ka shumë intelektual dhe e mbajnë edhe Prishtinën.
Vegëza e artikullit të publikuar në reporteri.net dhe shpërndarë nga media tjera:
Analiza:
Pretendimi i bërë nga mediat është bazuar vetëm në një fotografi, siç thuhet “që po qarkullon në rrjetet sociale”, ku Krasniqi shihet në prani të Kurtit, por burimi i së cilës nuk dihet. Pra, përveç kësaj fotografie, nuk është trajtuar ndonjë fakt tjetër më hollësishëm që do ta plotësonte atë që pretendohet në titull. Për këtë arsye, hibrid.info e vlerëson këtë artikull si “përmbajtje e pa verifikuar” dhe “clickbait”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.