Portali “kosova-sot.info” ka publikuar një artikull me titull përgjithësues “Doza e tretë të vaksinës këtë muaj”.
Me këtë titull të vendosur nga portali “kosova-sot.info”, nuk qartësohet se cili shtet do të fillojë të japë edhe dozën e tretë të vaksinës anti-Covid në muajin shtator. Ndërsa lajmi qartësohet vetëm në përmbajtje, ku bëhet e ditur se në fakt bëhet fjalë për shtetin e Italisë.
Duke ditur se portali “kosova-sot.info” publikon përmbajtje në gjuhën shqipe dhe se shumicën dërmuese të lexuesve i ka nga Kosova, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se ky vendim ka të bëjë me shtetin kosovarë.
Pjesë nga teksti i artikullit të publikuar në “kosova-sot.info”:
Ministri i Shëndetësisë, Roberto Speranza, ka njoftuar se Italia do të fillojë të japë një dozë të tretë të vaksinave kundër COVID-19 për grupet e njerëzve të konsideruar veçanërisht të brishtë.
“Ne kemi dozën e tretë në Itali”, ka thënë Speranza të hënën, shkruajnë mediat italiane.
“Ne do të fillojmë në shtator me pacientë të brishtë si ata nga onkologjia dhe pacientët me transplantime”.
Vegëza e artikullit të publikuar në “kosova-sot.info”:
https://www.kosova-sot.info/lajme/567245/doza-e-trete-te-vaksines-kete-muaj/
Analiza:
Portali “Kosova-sot.info” ka publikuar një artikull që ka të bëjë me një vendim për vaksinimin me dozën e tretë kundër virusit Korona në Itali, ndërsa në titull nuk sqaron se për cilin vend bëhet fjalë.
Kjo lë të kuptohet se lajmi ka të bëjë me Kosovën, duke e ditur se ky medium është i regjistruar në vendin tonë dhe shumica e audiencës janë shqipfolës nga Kosova, shtuar kësaj edhe faktin se portali në fjalë, fillimisht ka qenë e përditshme e shtypur në Kosovë.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.