Shkroi: Etrit Rexhepi
Janë publikuar fotografi ku shfaqen snajperistë të kamufluar me rroba të posaçme që i bëjnë të përzihen me mjedisin, me mbishkrimin që pretendon se bëhet fjalë për snajperistë të Forcës së Sigurisë së Kosovës (FSK-së).
Fillimisht kjo përmbajtje me këtë pretendim është publikuar të enjten (25 shtator ) nga një faqe në Facebook me emrin “Mitrovice Qyteti im”. Pastaj ajo është publikuar të shtunën (27 shtator) nga faqet “Mendim.al” dhe “Prishtina News”.
Pse nuk është i vërtetë pretendimi?
Hibrid.info ka gjetur se fotografitë me të cilat është publikuar pretendimi, nuk paraqesin snajperistë të FSK-së.
Hibrid.info ka kontrolluar secilën nga këto fotografi veçmas me anë të programit të automatizuar të kërkimit “InVID”.
Kërkimi për fotografinë e sipërme nuk ka gjetur prova që do të dëshmonin se se cilit shtet i përket snajperisti i shfaqur në pamje, por rezultatet kanë treguar se fotografia është gjetur në disa artikuj që kryesisht lidhen me konfliktin Armeni – Azerbajxhan (shih këtu).
Fotografia në anën e majtë të pjesës së poshtme tregon pamje të snajperistit të ushtrisë gjermane (shih këtu), ndërsa ajo në anën e djathtë është është gjetur në artikuj ku shfaqin pamje të ushtrisë turke (shih këtu).
Edhe për imazhin në qendër të pjesës së poshtme nuk është konfirmuar se për ushtrinë e cilit shtet bëhet fjalë, po kjo fotografi është hasur në disa raste si reklamim i rrobave të cilat vesh personi i shfaqur aty (shih këtu).
Analiza:
Përmes disa fotografive ku shihen ushtarë me snajperë, pretendohet se bëhet fjalë për pjesëtarë të FSK-së.
Me anë programit të automatizuar të kërkimit “InVID”, është gjetur se fotografitë nuk lidhen me FSK-në, por me ushtrinë gjermane, atë turke, konfliktin Armeni–Azerbajxhan, si dhe me përdorim reklamues të rrobave të kamuflazhit.
Andaj, bazuar në këto gjetje dhe me anë të metodologjisë së punës, hibrid.info e vlerëson pretendimin si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.