Disa media serbe kanë publikuar një sërë artikuj me temë – ndërtimi i bazës ushtarake në Mitrovicë.
Në pothuajse të gjithë artikujt që trajtojnë këtë temë, janë marr deklarata të zyrtarëve serbë, të cilët kanë trilluar skenarë, për siç pretendojnë, rrezikun që i kanoset komunitetit serb në veri, nga ndërtimi i kësaj baze.
Udhëheqësi i komisionit për Kosovën, në Parlamentin e Serbisë, Milovan Drecun, ka bërë një deklaratë për mediat serbe, duke pretenduar pa fakte se baza që pritet të ndërtohet, do të shërbejë kundër komunitet serb në veri.
Deklarata e Drecun për televizionin shtetëror serb RTS, e përkthyer në shqip:
“Ata do të kenë terren trajnimi, do të kenë stacione vëzhgimi dhe do të jenë në gjendje të kryejnë një lloj kryqëzimi të shpejtë nga ajo zonë, dmth depërtimi i shpejtë dhe vendosja në veri të Kosovës deri në vijën administrative me Serbinë qendrore do të parandalojë furnizimin e mundshëm të ndihmave nga Beogradi për popullatën serbe të rrezikuar”.
Vegëza e artikullit dhe kronikes së RTS-së:
Përveç RTS-së, i njëjti artikull është shpërndarë edhe nga një numër i mediave tjera në gjuhën serbe në Serbi e Kosovë.
Vegëzat e artikullit të shpërndarë nga disa media tjera:
Pretendimet e Drecun për skenarët e kësaj baze ushtarake, nuk kanë mbështetje në asnjë fakt dhe argument. Vetë zyrtarët e NATO-s, të cilët kanë misionin e tyre në Kosovë (KFOR), nuk e kanë argumentuar këtë pretendim të Drecun-it. Një zyrtar i NATO-s, në një prononcim për mediumin në gjuhën serbe “kossev.info”, ka thënë se kjo organizatë mbështetë ndërtimin e kësaj baze.
Deklarata e NATO-s për kossev.info, e përkthyer në shqip:
“Qëndrimi ynë për Forcën e Sigurisë së Kosovës ka qenë i qartë dhe konsistent. Ne mbështesim zhvillimin e Forcës së Sigurisë së Kosovës sipas mandatit të saj fillestar, pra të një force për mbrojtje civile. Pas ndryshimit të mandatit, ne po e rishqyrtojmë nivelin tonë të angazhimit në FSK”.
Vegëza e publikimit të kësaj deklarate në kossev.info:
Lajmi për ndërtimin e kësaj baze ushtarake u bë aktual në momentin kur Kuvendi Komunal i Mitrovicës së Jugut, miratoi një kërkesë të bërë nga Ministria e FSK-së, për t’ia dhënë në shfrytëzim afatgjatë një pronë prej 191 hektarë, në vendin e quajtur “Kodra e Cërrnushës” që gjendet pranë këtij qyteti.
Sikurse kryetari i Mitrovicës, Agim Bahtiri, ashtu edhe ish-zëvendësministri i Mbrojtjes, Enver Dugolli, nuk ka janë deklaruar se kjo bazë ka për qëllim zbatimin e strategjive që janë në dëme të popullit serb që jeton në atë pjesë, siç pretendon Drecun.
Vegëza me deklaratat e Bahtirit dhe Dugollit, të publikuar në një artikull në kallxo.com:
Analiza:
Në bazë të analizës së kontrollit për pretendimin e bërë nga Milovan Drecun, rezulton se ky zyrtar serb ka krijuar skenarë për qëllimin e kësaj baze ushtarake, të pabazuara në fakte. Për më tepër, pretendimet e Drecun janë në një kohë kur nuk është bërë i qartë as plani i kësaj baze.
Për këtë arsye, hibrid.info e vlerëson këtë deklaratë të Drecun-it si “Teori Konspirative” dhe “Përmbajtje të Paverifikuar”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.