Artikulli me titull “Jovanoviç: Serbia e ka humbur Kosovën por me Albinin Kryeministër do e marrim prapë” është publikuar nga portali i dyshimtë me përmbajtje në gjuhën shqipe “banglarreporter.com”.
Pas analizës së kontrollit të fakteve të kryer nga hibrid.info, ky artikull është vërtetuar se është komplet i fabrikuar, i cili përmban titull të rremë, si dhe ka ndërhyrje në përmbajtje.
Pas hulumtimit përmes makinave të kërkimit, Hibrid.info ka arritur të gjejë artikullin autentik me intervistën e Kryetarit të Partisë Liberale në Serbi, Çedomir Jovanoviq, të realizuar nga televizioni shqiptar “Klan TV” me datë 3 nëntor 2019. Artikulli i “banglarreporter.com” ka shfrytëzuar këtë lajm të vitit 2019, për ta ndërtuar pretendimin e rremë
Në fakt, Jovanoviq në këtë intervistë asnjëherë nuk ka përmendur emrin e Albin Kurtit, por ka deklaruar se Serbia ka kapitulluar në Kosovë, që ka kryer krime atje, por që është e nevojshme të gjendet një zgjidhje.
Pjesë nga artikulli i publikuar në portalin e dyshimtë “Banglarreporter.com”:
Gazetari: Keni thënë që Serbia ka kapitulluar në Kosovë… “Natyrisht. Kapitullimi ka qenë njësoj si gjermanët në vitin ‘45 kur fillimisht kapitulluan te amerikanët dhe më pas arriti Zhukovi dhe u tha ejani sërish dhe kapitulluan edhe për rusët”.
Jovanoviç: Serbia e ka humbur Kosovën por me Albinin Kryeministër do e marrim prapë
Vegëza e artikullit të publikuar në portalin e dyshimtë “Banglarreporter.com”:
Intervista e plotë të Jovanoviqit e realizuar në Klan TV me 3 nëntor 2019 (këtu).
Ky lajm i rremë është shpërndarë edhe në Facebook nga faqja “Gazeta Aktive” e cila numëron mbi 90 mijë ndjekës (shih këtu).
Postimi i këtij lajmi në Facebook nga faqja “Gazeta Aktive”, deri në momentin kur është trajtuar nga hibrid.info, ka arritur të gjenerojë një trafik të lartë. Niveli i interaksionit është:
- 41 REAGIME
- 57 KOMENTE
- 16 SHPËRNDARJE
Analiza:
Portali i dyshimtë “banglarreporter.com” ka publikuar një intervistë të vjetër të Kryetarit të Partisë Liberale në Serbi, Çedomir Jovanoviq, të realizuar nga televizioni shqiptar “Klan TV” me datë 3 nëntor 2019.
Në titullin dhe përmbajtjen e këtij artikulli është ndërhyrë qëllimshëm duke pretenduar rrejshëm se ai ka thënë që me Albin Kurtin kryeministër, Serbia do e marrë prapë Kosovën”.
Nga kontrolli i bërë nga hibrid.info, u vërtetua se ky artikull përmban titull të sajuar dhe përmbajtje të fabrikuar. Kështu që pas analizës, artikull i trajtuar merr vlerësimin si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.