Disa faqe në Facebook kanë publikuar me datë 19 dhe 20 korrik një postim me pretendimin se Forcave të Sigurisë së Kosovës (FSK) do t’u shtohen edhe gjashtë pajisje ushtarake kundër-ajrore “Aselsan 35mm”.
Pas verifikimit të fakteve të kryer nga hibrid.info, nuk është gjetur asnjë informacion i publikuar në mediume kredibile dhe faqe zyrtare që ndërlidhet me furnizimin e FSK-së me këto pajisje ushtarake.
Vegëzat e postimit të publikuar në Facebook nga faqet “Mbeshtetesit e Albin Kurtit” dhe “Diaspora me Albinin”:
Këto postime të bëra nga faqet e lartcekura kanë arritur të grumbullojnë qindra reagime e dhjetëra komente. (shih fotografitë më poshtë)
Përveç që një pretendim i tillë nuk është gjetur i publikuar në asnjë medium, një informacion i tillë nuk është gjetur as në ueb-faqen zyrtare të Ministrisë së Mbrojtjes së Kosovës (MB). (shih këtu)
Në faqen zyrtare në Facebook të këtij institucioni, informacioni i vetëm që është gjetur nga hulumtimi i bërë, i takon vitit 2020, atëkohë kur ministri Anton Quni, kishte vizituar kompaninë Aselsan si prodhuese kryesore e sistemeve të komunikimit, radarëve, luftës elektronike, mbrojtjes ajrore dhe të shënjestrimit. (shih këtu)
Analiza:
Pas verifikimit të fakteve, hibrid.info ka vërtetuar se faqet e lartcekura kanë pretenduar rrejshëm se FSK-ja do të furnizohet me gjashtë pajisje ushtarake kundër-ajrore “Aselsan 35mm”.
I njëjti informacion nuk është gjetur i publikuar në asnjë medium kredibil, e as në ueb-faqen zyrtare të Ministrisë së Mbrojtjes, si institucion relevant.
Bazuar në metodologjinë e punës, hibrid.info e vlerëson këtë pretendim si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.