Në median sociale “TikTok” është publikuar një video-material me mbishkrimin “Pandemia Axar në 2024” nga llogaria me emrin “lumjanana009”, në të cilin pretendohet për një sërë planesh për botën, të planifikuara nga takimi i fundit (16 qershor 2021) i presidentit të SHBA-ve, Joe Biden me presidentin rus, Vladimir Putin.
Video-materiali pretendon se si rezultat i takimit të liderëve të SHBA-ve dhe të Rusisë, u planifikua lufta në Ukrainë, përdorimi i armëve biologjike në Evropë si dhe zhdukja e 20 mijëra çeçenëve.
Mirëpo hibrid.info ka arritur të vërtetojë se pretendimet e paraqitura në këtë video-material janë të paverifikuara dhe si të tilla nuk qëndrojnë.
Vegëza e video-materialit të publikuar në “TikTok” nga llogaria “lumjanana009”:
Ky video-material i publikuar sot (9 maj), deri tani ka grumbulluar mbi 20 mijë shikime. (shih fotografinë më poshtë)
Pas hulumtimit të kryer përmes makinave online të kërkimit, hibrid.info ka gjetur të publikuar në faqen e “Shtëpisë së Bardhë”, konferencën për media të presidentit, Joe Biden, pas përfundimit të samitit SHBA-Rusi, në të cilin edhe u realizua takimi ndërmjet dy presidentëve të këtyre dy vendeve më 16 qershor 2021. (shih këtu)
Presidenti amerikan në konferencë kishte folur për marrëdhënie të fuqishme dhe stabile ndërmjet dy vendeve si dhe për bashkëpunim kur është fjala për interesat reciproke.
Hibrid.info po ashtu ka gjetur të publikuar edhe reagimin e presidentit Biden, kundër sulmit të Ukrainës nga Rusia, më 23 shkurt 2022. (shih këtu).
Kurse sa i përket pretendimit për përdorimin e armëve biologjike, ky pretendim ishte kontrolluar dhe hedhur poshtë nga verifikuesit e fakteve, “bbc.com” dhe “frontline.thehindu.com”. (shih këtu dhe këtu)
Analiza:
Llogaria në TikTok me emrin “lumjanana009” ka publikuar një video-material që tregon për disa pretendime për plane të fshehta në takimin ndërmjet dy presidentëve të SHBA-së dhe Rusisë, më saktësisht, Joe Biden dhe Vladimir Putin.
Mirëpo në përmbajtje, mungojnë dëshmitë të cilat do të verifikonin vërtetësinë e pretendimeve të paraqitura. Bazuar në metodologjinë e punës, hibrid.info e vlerëson këtë pretendim si “Teori Konspirative”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.