Faqja në Facebook “Njësia Speciale” ka publikuar dje (24 shtator) një video-material me mbishkrimin “Njësia Speciale blindon veriun e Kosovës”.
Këtë video-material, faqja e lartcekur është munduar ta paraqesë si pamje nga aksioni i djeshëm (24 shtator) i Policisë së Kosovës në veri të vendit.
Pas verifikimit të fakteve të kryer nga hibrid.info, është vërtetuar se video-materiali nuk i përket ngjarjeve të ditës së diel në veri të Kosovës, por e njëjta është gjetur e publikuar jo më herët se data 29 maj e këtij viti.
Vegëza e postimit të publikuar në Facebook nga faqja “Njësia Speciale”:
https://www.facebook.com/watch/?v=863230711902728
Ky video-material i publikuar dje (24 shtator) ka arritur të grumbullojë mijëra reagime e qindra komente.
Pas hulumtimit përmes programit të automatizuar “InVID”, hibrid.info ka arritur të gjejë video-materialin e njëjtë të publikuar me datë 29 maj në Facebook nga faqja e quajtur “Kosova”. (shih këtu)
Analiza:
Faqja “Njësia Speciale” në Facebook ka publikuar një video të vjetër në të cilën shihen disa pjesëtarë të Policisë së Kosovës, me pretendimin se ajo u realizua gjatë aksionit të djeshëm (24 shtator) në veri të Kosovës.
Bazuar në metodologjinë e punës, hibrid.info e vlerëson këtë postim si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
