Disa portale informative me përmbajtje në gjuhën shqipe të cilat kanë raportuar rreth vrasjes së një shqiptari në Greqi, kanë vënë gabimisht fotografinë e një personi tjetër, duke pretenduar se ai është personi që ka mbetur i vrarë.
Por, pas hulumtimit dhe verifikimit të fakteve të kryera nga hibrid.info, është gjetur se ky pretendim nuk qëndron dhe se personi i vrarë në fakt është dikush tjetër.
Vegëza e artikullit të publikuar nga “Gazeta Shqiptare” dhe “Tetova Sot”:
Gjatë kërkimeve në internet është gjetur postimi i bërë nga personi, fotografia e të cilit është përdorur gabimisht nga portalet e përmendura më lart. Ai në profilin e tij në median sociale Facebook, kishte shkruar një status në gjuhën greke duke sqaruar se nuk ka lidhje me ngjarjen e ndodhur dhe se fotoja e tij është përdorur gabimisht. (shiko këtu)
Postimi i tij i plotë i përkthyer në gjuhën shqipe:
“Njoftim: sot në mëngjes mora vesh se fotoja ime është publikuar në disa përditësime të faqeve, brenda Greqisë dhe më pas jashtë Greqisë, më lejoni të bëj të qartë se nuk kam absolutisht asnjë lidhje me çështjen dhe gjithçka tjetër është marrë përsipër nga një avokat. një falje për njerëzit që u shqetësuan”
Edhe mediumet si “Syri.net” dhe “Dosja.al” kanë trajtuar këtë rast, duke treguar me fotografi që personi i vrarë është dikush tjetër dhe se personi i paraqitur në media nuk ka lidhje me rastin në fjalë, e që sipas tyre ngatërresa ka ndodhur për shkak të mbiemrit të njëjtë të tyre. (shiko këtu dhe këtu)
Analiza:
Disa media online kanë publikuar gabimisht fotografinë e një personi tjetër, duke pretenduar se ai është personi i vrarë në ngjarjen e ndodhur në Greqi.
Gjatë kërkimeve në internet, hibrid.info ka gjetur reagimin nga personi, fotografia e të cilit është përdorur gabimisht, i cili ka sqaruar se nuk ka lidhje me ngjarjen.
Gjithashtu edhe disa media shqipe kanë trajtuar këtë rast duke treguar se ai është ngatërruar me një person tjetër për shkak të mbiemrit të njëjtë.
Në bazë të metodologjisë së punës, hibrid.info e vlerëson këtë artikull si “Përmbajtje e paverifikuar” dhe “Gabim”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.