Portali i dyshimtë “specialja.com” më 18 prill ka publikuar një artikull me titull “Endriti takon për herë të parë vëllain prej babe – fëmiun jashtëmartesor të Thaçit”.
Në këtë artikull shihet edhe një fotografi e Endritit Thaçit, së bashku me babain e tij, ish-presidentin e Kosovës, Hashim Thaçin, por fytyra e këtij të fundit është e rinuar përmes filtrit të aplikacioneve i cili mundëson të shihet se si mund të duket një fytyrë e plakur ose e rinuar.
Pas hulumtimit të kryer nga hibrid.info përmes makinave të kërkimit është parë se ky artikull ka përmbajtje satirike, i publikuar nga portali “Kukunews.net”, i cili njihet për artikuj me përmbajtje të tillë. Ndërsa, portali i dyshimtë “specialja.com” e ka publikuar këtë lajm, duke pretenduar ta paraqes si të vërtetë.
Hibrid.info nuk ka arritur ta gjejë artikullin autentik në “Kukunews.net”, por ky portal satirik është cituar në tekst nga portali tjetër i dyshimtë “lajmetari.net”, i cili në vitin 2019 ka shpërndarë të njëjtin shkrim.
Vegëzat e artikullit të publikuar nga “specialja.com” dhe “lajmetari.net”:
Më poshtë mund të gjeni fotografinë origjinale ku shihet ish-presidenti i Kosovës Hashim Thaçi me djalin e tij Endritin.
Analiza:
Portali i dyshimtë “specialja.com” ka publikuar një artikull me përmbajtje satirike, të publikuar më parë nga portali satirik “Kukunews.net”, të cilin ka pretenduar ta paraqes si lajm të vërtetë.
I njëjti artikull është publikuar në vitin 2019, nga portali tjetër i dyshimtë “lajmetari.net”, ku i referohet portalit satiric “Kukunews.net”.
Megjithatë, hibrid.info nuk ka arritur ta gjejë shkrimin autentik në portalin satirik, i cili me gjasë është fshirë nga uebfaqja.
Pas analizës së kontrollit të fakteve, hibrid.info e vlerëson këtë artikull si “satirë”.
Arsyetimi:
Vlerësimi i “Satirës” përfshinë përmbajtjen e cila përdor lajme të paramenduar që përdorin satirën për të treguar realitetin. Ky është edhe një mënyrë e raportimit i cili nuk është problematik, nëse media arrin të argumentojë se bëhet fjalë për një përmbajtje satirike.
Qëllimi i përfshirjes së këtij vlerësimi në metodologji është të tregohet ky lloj i përmbajtjes në situata kur mund të pretendohet se është një raport i vërtetë i mediave dhe kur bëhet potencialisht i dëmshëm në rast të transmetimit të mëtejshëm pa arritur që të shpjegohet qartë se bëhet fjalë për tekst satirik. Pra në raste të tilla, nëse një tekst nuk arrin të sqaroj se ka përmbajtje satirike, mund te kuptohet si i vërtetë dhe, si rrjedhojë, mund të krijojë opinion të gabuar tek audienca. Mirëpo, media që boton këtë lloj përmbajtjeje nuk mund të jetë në njërën nga listat negative vetëm për shkak të publikimit të këtij lloji të përmbajtjes.
