Portali “Telegrafi.com” ka publikuar një artikull rreth mungesës së futbollistit të Kosovës, Amir Rrahmani për ndeshjen kundër Maqedonisë së Veriut, e cila pritet të zhvillohet me 8 tetor.
Megjithatë, titulli i Telegrafit nuk përkon me përmbajtjen e lajmit, pasi në konferencën e mbajtur nga trajneri dhe menaxheri i Kombëtares së Kosovës Bernard Challandes gjegjësisht Bajram Shala, kanë thënë se ende nuk ka asgjë finale rreth mungesës së Rrahmanit.
Vegëza e artikullit të Telegrafi.com:
Në konferencën e mbajtur sot (5 tetor), menaxheri i Kombëtares së Kosovës, Bajram Shala, ndër të tjera tha se ende nuk janë shuar shpresat për pjesëmarrjen e kapitenit Rrahmani në ndeshjen kundër Maqedonisë së Veriut.
“Ne jemi në kontakt të vazhdueshëm me FIFA-n, sepse në fund të fundit të drejtën për lirimin e futbollistëve apo ndalimin e tyre e ka FIFA. Nga kontakti i fundit që e kam pasur rreth 5 minuta para fillimit të kësaj konference, situata duket më pozitive se sa realisht është raportuar në media. Ne jemi duke e bërë të pamundurën që Amir Rrahmani t’i bashkohet ekipit qoftë sot brenda ditës, qoftë nesër në mëngjes”.
Deklaratën e plotë e Shalës për Rrahmani mund ta ndiqni nga minuta 6:55:
Kujtojmë se klubi i Napoli-t, ku luan Rrahmani, ka vendosur tërë ekipin në karantinë shkaku që disa futbollistë kanë rezultuar pozitivë me virusin Korona.
Analizë:
Artikulli i Telegrafi.com përmban titull të sajuar, i cili nuk përputhet me tekstin që i referohet konferencës së mbajtur nga trajneri Challandes. Ky artikull kategorizohet si “Dezinformatë”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
