Portali i dyshimtë “Specialja.com” ka publikuar një artikull, me të cilin pretendohet se LDK dhe PDK pritet të bëjnë koalicion, ndërsa Isa Mustafa të jetë president i vendit.
Titulli i artikullit është i rremë, pasi nuk përputhet me përmbajtjen. Në fakt, në përmbajtje të artikullit paraqitet një pjesë e deklaratës së kreut të Partisë Demokratike të Kosovës (PDK), Kadri Veseli, i cili flet për heqjen e vijave të kuqe të bashkëpunimit me Lidhjen Demokratike të Kosovës (LDK).
Teksti origjinal i publikuar në Specialja.com:
Urime na qoftë Isa president / Paralajmërohet koalicioni ‘Fitues’ mes LDK-së dhe PDK-së
Kryetari i Partisë Demokratike të Kosovës, Kadri Veseli në një konferencë për media ka folur për heqjen e vijave të kuqe nga LDK.
Ai ka theksuar se nuk është PDK ajo e cila ka vendosur apo ka hequr vija të kuqe. I pyetur nga gazetarët, ai tha se për këtë duhet të pyetet LDK-ja.
Ndryshe, ditë më parë lideri i LDK-së, Isa Mustafa ka theksuar se partia e tij ia ka hequr vijat e kuqe PDK-së. / Hap veç 1 prej 4 marketingjeve për 5 sekonda dhe shfaqen pamjet ekskluzive!
Vegëza e artikullit të botuar në Specialja.com:
Analiza:
Artikulli i Specialja.com përmban titull të sajuar, ndërsa përmbajtja nuk është e plotë dhe nuk korrespondon me titullin. Si rrjedhojë, ky artikull kategorizohet si “Clickbait” dhe “Dezinformatë”.
Arsyetimi:
Clickbait
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
Dezinformata
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.