Portali i dyshimtë “gjithckafresh.info” ka publikuar një artikull me titull “Nuk ju shkon mendja, zbulohet çfarë i dha Avdullah Hoti presidentit Trump sdo ta besoni??”.
Pas analizës së kontrollit të fakteve të kryer nga hibrid.info, del që ky artikull përmban titull të sajuar, i cili nuk përputhet me përmbajtjen.
Në fakt, në përmbajtjen e këtij artikulli flitet për dhuratat që shkëmbyen ish-presidenti i SHBA-ve, Donald Trump dhe homologu i tij serb, Aleksandar Vuçiq, pas nënshkrimit të marrëveshjes mes Kosovës dhe Serbisë në Shtëpinë e Bardhë gjatë muajit shtator të vitit të kaluar.
Pra pretendimi i bërë përmes titullit, se gjoja kryeministri i Kosovës, Avdullah Hoti, i kishte dhënë dhuratë ish-presidentit Trump-it, del të jetë i rremë.
Pjesë nga teksti i artikullit të publikuar nga “gjithckafresh.info”:
Nuk ju shkon mendja, zbulohet çfarë i dha Avdullah Hoti presidentit Trump sdo ta besoni??
Mediat serbe kanë zbuluar dhuratat që shkëmbyen Presidenti i SHBA-ve, Donald Trump dhe homologu i tij i Serbisë Aleksandër Vuçiç pas nënshkrimit të marrëveshjes mes Kosovës dhe Serbisë në Shtëpinë e Bardhë.
Trump i ka dhënë Vuçiçit një stilolaps dhe çelësin e Shtëpisë së Bardhë. Vuçiç tha pas takimit se kreu i SHBA-ve i ka lënë edhe një shënim në një letër ku i thotë se “vetëm ai do të jetë në gjendje të futet brenda Shtëpisë së Bardhë”.
“Ky është një stilolaps që unë kam marrë nga Donald Trump. Vetëm ai ka nënshkruar me të, ndërsa ai më shkruajti një shënim në një copë letër. Kam marrë çelësat e Shtëpisë së Bardhë. Ai më tha: “Kjo është për ty që të jesh gjithmonë në gjendje të hysh në Shtëpinë e Bardhë”, – shprehet Vuçiç.
Vegëza e artikullit të publikuar nga “gjithckafresh.info”:
Më poshtë mund t’i gjeni vegëzat e artikullit të publikuar në kohë reale nga disa media online në gjuhën shqipe.
https://lapsi.al/2020/09/04/foto-zbulohen-dhuratat-qe-shkembyen-trump-dhe-vucic/
Analiza:
Portali i dyshimtë “gjithckafresh.info” ka përdorur një lajm të vjetër të cilit i ka vënë titull të rremë, në mënyrë që të tërheqë lexuesit të klikojnë në të. Këtë artikull e ka shpërndarë faqja “Gazeta Aktive” në Facebook, e cila numëron afër 90 mijë pëlqime.
Pas verifikimit nga hibrid.info, del që ky artikull kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërteta. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.