Portali informativ “Kosova-sot.info” ka publikuar dje (24 janar) një artikull me titull “7 persona të vra*rë nga të shtënat masive”.
Pas verifikimit të fakteve të kryer nga hibrid.info, është vërtetuar që titulli i këtij artikulli nuk e bënë të qartë lajmin dhe vendndodhjen e kësaj ngjarje.
Lajmi qartësohet vetëm në përmbajtje, ku thuhet se “Shtatë persona u qëlluan për vdekje të hënën në San Mateo, Kaliforni, duke shënuar të shtënat e dyta masive në tre ditë në shtet, thanë autoritetet, transmeton gazeta “Kosova Sot Online””.
Përveç titullit që nuk qartëson vendndodhjen e ngjarjes, edhe fotografia e vendosur në këtë artikull nuk i përgjigjet përmbajtjes, pasi në të shihet shiriti i policisë në të cilin shkruan shqip “SHIRITI I POLICISE MOS KALONI”, që lë të kuptohet se ngjarja ka ndodhur në ndonjë vend shqipfolës.
Duke e ditur se ky portal informativ është i regjistruar në Kosovë (shih këtu) dhe shumicën e lexuesve i ka shqipfolës (shih këtu), kjo mund t’i dezinformojë lexuesit se ngjarja ka ndodhur në Kosovë.
Pjesë nga artikulli i publikuar në portalin “Kosova-sot.info”:
Shtatë persona u qëlluan për vdekje të hënën në San Mateo, Kaliforni, duke shënuar të shtënat e dyta masive në tre ditë në shtet, thanë autoritetet, transmeton gazeta “Kosova Sot Online”.
Incidenti i të shtënave u raportua në dy vende të veçanta, me katër persona të vrarë në një fermë dhe tre viktima të tjera u gjetën të vdekur në një zonë të ndryshme.
Një burrë 67-vjeçar i quajtur Zhao Chunli u identifikua si i dyshuari dhe u arrestua, tha Zyra e Sherifit të Qarkut San Mateo në një postim në Twitter.
Vegëza e artikullit të publikuar në portalin “Kosova-sot.info”:
Për ta vërtetuar edhe më shumë faktin se kjo ngjarje ka ndodhur në Kaliforni, hibrid.info ka gjetur artikullin e publikuar në disa mediume të huaja si “NBC ” dhe “ABC News”.
Analiza:
Në titullin e artikullit të publikuar nga “Kosova-sot.info” nuk sqarohet se në cilin shtet ka ndodhur kjo ngjarje, ndërsa lajmi qartësohet vetëm në përmbajtje, ku bëhet e ditur se rasti në fjalë ka ndodhur në Kaliforni.
Portali informativ “Kosova-sot.info” vepron në Kosovë dhe lexuesit parësor i ka nga Kosova, bazuar në përcjellësit e faqes në Facebook. Prandaj, mosdhënia e informacioneve për vendin se për ku bëhet fjalë, ky lajm shumë lehtë mund t’i dezinformojë lexuesit e vet, duke i bërë të mendojnë se ngjarja ka ndodhur në Kosovë.
Bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.