Portali i dyshimtë “mergimtarshqip.com” ka publikuar një artikull me titull “Sipas njoftimit të ri që në muajin korrik do të jepen nga 200 euro për qytetarët”.
Nga verifikimi i fakteve në këtë artikull, hibrid.info ka vërtetuar se titulli është përgjithësues, duke mos e bërë të qartë se cili shtet ka marrë vendim për ndarjen e kësaj shume për qytetarët.
Në përmbajtje qartësohet deri diku lajmi. Vetëm me të hapur artikullin, bëhet e ditur se lajmi i korrespondon një vendimi të vjetër të autoriteteve në Itali për mbështetje financiare ndaj qytetarëve të këtij vendi, që kishte raportuar e përditshmja italiane “Corriere della sera”.
Pra, lajmi nuk ka të bëjë me ndonjë vend shqipfolës, nga e ka të orientuar audiencën ky portal i dyshimtë.
Vegëza e artikullit të publikuar në portalin e dyshimtë “mergimtarshqiptar.com”:
Ky artikull është shpërndarë edhe në Facebook nga faqja “Gazeta”, e cila numëron mbi 200 mijë ndjekës. Ndërsa në këtë postim ka arritur të grumbullojë numër të madh reagimesh e komentesh. (shih këtu)
Pas hulumtimit përmes makinave online të kërkimit, hibrid.info ka arritur të gjejë këtë artikull të publikuar më 5 maj nga mediumi italian “Corriere della sera”. (shih këtu)
Analiza:
Portali i dyshimtë “mergimtarshqip.com” ka publikuar një artikull që ka ta bëjë me shtetin italian, i cili ka vendosur që në muajin korrik të ndajë bonus prej 200 eurosh për punëtorët dhe pensionistët me të ardhura të ulëta, me synimin për të luftuar koston e lartë të jetesës.
Por, ky portal i dyshimtë në titull nuk ka treguar se bëhet fjalë për shtetin e Italisë.
Bazuar në metodologjinë e punës, hibrid.info e ka vlerësuar këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.