Shkroi: Endrit Berisha
Nëpërmjet një titulli është pretenduar se Qeveria e Kosovës sot (28 qershor) do të vendosë se a do ta mbyllë një rrjet social.
Artikulli është publikuar nga portali në gjuhën shqipe “telenews.al”.
Çka nuk shkon me këtë titull?
Vetëm pas klikimit në artikull kuptohet se propozimi është për ndalim të rrjetit social TikTok vetëm për institucionet.
“Qeveria e Kosovës sot vendos se a do ta mbyll këtë rrjet social!”, mban titullin artikulli i “telenews.al”.
Vegëza e artikullit të publikuar në portalin “telenews.al”:
Përmbajtja e artikullit:
“Qeveria e Kosovës sot mban mbledhjen e saj të rradhës.
Në këtë mbledhje do të ketë disa pika të rendit të ditës e një ndër to është edhe shqyrtimi i propozim-vendimit për ndalimin e funksionimit të shërbimeve të rrjetit social ”Tik Tok” në të gjitha institucionet e Republikës së Kosovës, transmeton Telenews.al
Kjo mbledhje fillon nga ora 14:00.”
Çfarë thotë pika e pestë e rendit të ditës për mbledhjen e 211-të të Qeverisë së Kosovës (Dokumenti i plotë – shih këtu):
5. Shqyrtimi i Propozim-vendimit për ndalimin e funksionimit të shërbimeve të Rrjetit Social “Tik Tok” në të gjitha Institucionet e Republikës së Kosovës (MPB)
Për më shumë, ky medium në publikimin e artikullit në Facebook ka përdorur fjali për të tërhequr lexueshmëri. “Do te befasoheni se cili rrjet social eshte!! ????” thuhet në përshkrim të postimit.
Analiza:
Portali në gjuhën shqipe “telenews.al” ka publikuar të premten (28 qershor) një artikull me titullin “Qeveria e Kosovës sot vendos se a do ta mbyll këtë rrjet social!”. Pas klikimit në artikull sqarohet se bëhet fjalë për propozim për ndalim të këtij rrjeti social vetëm për institucione.
Bazuar në metodologjinë e punës, hibrid.info e vlerëson këtë titull si “Clikbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.