Ish-Kryeministri dhe ish-udhëheqësi i Partisë Demokratike në Shqipëri, Sali Berisha, ka postuar në llogarinë e tij në Facebook një publikim të mediumit austriak “Zeit im Bild”, në të cilin paraqiten imazhe të vërshimeve në Shqipëri e Kosovë.
Mirëpo, në postimin e tij në Facebook, Berisha ka publikuar një fotografi me një imazh nga Kosova, përkatësisht shkatërrimi i një rruge në komunën e Malishevës, me pretendimin se një gjë e tillë ka ndodhur në Shqipëri. Këtë imazh Berisha e ka shfrytëzuar për të ngritur akuza ndaj kryeministrit aktual të Shqipërisë, Edi Rama:
Mediat austriake publikojne foto dhe tallen me rruget e Edvin Hajdutit!
Ato asfaltohen jashte çdo standarti duke duke hedhur asfalt shkel e shko mbi, kurse fondet e shtresave nen asfalt vidhen dhe ndahen me pushtetare! Kjo eshte nje foto e publikuar ne mediat austriake. Sb
https://www.facebook.com/SaliBerisha/posts/1811179629042936
E njëjta fotografi, ditë më parë është publikuar nga mediat kosovare, duke iu referuar një ngjarjeje të ndodhur në komunën e Malishevës. Asfalti dhe struktura e rrugës që ishte shtruar së fundmi, ishte shkatërruar nga vërshimet e ujit nga të reshurat e shiut dhe borës.
Vegëzat e lajmit të publikuar nga mediat kosovare:
Ky imazh, së bashku me imazhe tjera nga Kosova dhe Shqipëria, ishin publikuar nga mediumi austriak “Zeit Im Bild”, pjesë e një përshkrimi që ky medium i kishte bërë gjendjes së vërshimeve në këto dy vende.
Postimi autentik i mediumit austriak “Zeit im Bild” për vësrshimet në Kosovë e Shqipëri, i përkthyer në shqip:
Përmbytjet: Shqipëria dhe Kosova janë duke përjetuar përmbytje të mëdha. Për ditë të tëra ka pasur reshje të borës dhe shiut në dy vendet e Ballkanit. Në Shqipëri masat e ujit dëmtuan rrugë dhe ura, qindra njerëz po furnizohen me ujë të pijshëm të freskët nga shërbimet e urgjencës. Në Kosovë, njerëzit duhej të evakuoheshin nga shtëpitë e tyre. Të prekurit ankohen për mungesë të ndihmës: “Askush nuk kujdeset”, thotë një burrë, shtëpia e të cilit ishte përmbytur.
Vegëza e artikullit të “Zeit im Bild”:
Analiza:
Ish udhëheqësi politik i Shqipërisë, Sali Berisha, duket se ka përdorur fotografi të gabuar për ta akuzuar kryeministrin Edi Rama. Pra në bazë të fakteve rezulton se Berisha ka ndërtuar një pretendim mbi komentin e një fotografie jo adekuate. Duke qenë se Berisha vazhdon të jetë një politikan me ndikim në Shqipëri dhe më gjerë, hibrid.info ka vendosur ta trajtojë postimin e tij, duke ja vlerësuar si “Përmbajtje e Pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.