Shkroi: Fatbardh Dema
Një video që paraqet një helikopter duke hedhur një material në formë pluhuri, po pretendohet se është realizuar në kryeqytetin e Maqedonisë së Veriut, Shkup.
Kjo përmbajtje u publikua sot (8 janar) në TikTok nga llogaria “joqmacedonia” me mbishkrimin “SOTË NË SHKUP”.
Çka gjeti hibrid.info?
Pas hulumtimit të kryer online nga hibrid.info, u vërtetua se kjo video qarkullon në internet së paku nga data 1 dhjetor 2024 dhe se pretendohet se e njëjta u realizua në Florida të ShBA-së.
Pas hulumtimit të kryer përmes programit të automatizuar “InVID”, hibrid.info ka gjetur se kjo video për herë të parë është publikuar në TikTok nga llogaria “smoothviibes1” me datë 30 nëntor, 2024 dhe në përshkrimin e saj pretendohet se e njëjta është realizuar në Florida.
Po ashtu, kjo video u gjet e publikuar në Youtube nga kanali “KeepIn it Real” me pretendimin e njëjtë se u realizua në Florida.
Analiza:
Videoja e publikuar më 8 janar që paraqet një helikopter duke hedhur një material në formë pluhuri, u pretendua se u realizua në Shkup.
Pas hulumtimit të kryer nga hibrid.info, u vërtetua se kjo video është e vjetër dhe rezultatet e hulumtimit tregojnë se në ato publikime të vjetra kanë pretendimin se video-materiali u realizua në Florida të ShBA-së.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.