Shkroi: Etrit Rexhepi
Publikohet një video-material, ku shihet një automjet ushtarak në Kanada, për të cilin pretendohet se i përket Forcës së Sigurisë së Kosovës (FSK).
Kjo përmbajtje është publikuar (1 qershor) në TikTok nga një llogari me emrin “besimlikaj”.
E vërteta?
Hibrid.info ka gjetur se nuk bëhet fjalë për pajisje të cilën e posedon FSK-ja.
Hibrid.info me anë të programit t ë automatizuar të kërkimit, “InVID” ka gjetur se automjeti ushtarak i shfaqur në video është i tipit Stryker (shih këtu). Ky automjet është i prodhuar në Kanada në shërbim të Shteteve të Bashkuara të Amerikës. Në listën e shteteve të cilat janë pajisur me këtë automjet, nuk figuron Kosova (shih këtu).
Gjithashtu, në pajisjet që ka Kosova, nuk rezulton që Kosova ketë në dispozicion pajisje të tillë ushtarake (shih këtu).
Hibrid.info ka hulumtuar për vendin “boulevard pierre bertrand”, që shihet në tabelat e rrugës, të cilat shfaqen në video. Motori i kërkimit “Google”, tregon se lokacioni i këtij bulevardi është në Kanada (shih këtu).
Por, në faqen në Facebook, ku publikohen informacionet për FSK-në, nuk është gjetur ndonjë njoftim së fundmi, që tregon për pjesëmarrje, trajnim apo aktivitet të këtij institucioni në Kanada (shih këtu).
Analiza
Pretendimi se automjeti ushtarak i shfaqur në video në Kanada i përket FSK-së nuk qëndron.
Automjeti në fjalë është i tipit Stryker, i prodhuar në Kanada dhe i përdorur nga ushtria amerikane dhe jo pjesë e inventarit të Forcës së Sigurisë së Kosovës
Bazuar në metodologjinë e punës, hibrid.info vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.