Portali i dyshimtë “newsonline48h.com” ka publikuar një artikull me titull “Ambasadori Walker: Kurti Dhe Osmani E Turpëruan Shtetin E Kosovës Me Vizitën E Tyre Në Mitrovicë”.
Pas analizës së kontrollit të fakteve nga hibrid.info, del që ky artikull përmban titull të rremë dhe përmbajtje të ndryshuar.
Ky portal ka marrë një pjesë të tekstit nga reagimi i PDK-së në Facebook, lidhur me vizitën e Albin Kurtit dhe Vjosa Osmanit në Mitrovicën e Veriut, të cilin më pas e kanë ndryshuar duke pretenduar rrejshëm se këtë reagim e ka bërë diplomati amerikan William Walker.
Teksti i artikullit të publikuar në portalin e dyshimtë “newsonline48h.com”:
Ambasadori Walker: Kurti Dhe Osmani E Turpëruan Shtetin E Kosovës Me Vizitën E Tyre Në Mitrovicë
Në një intervistë për ExpressInfo, diplomati amerikan, Walker deklaron se Kurti dhe Osmani e turpëruan shtetin e Kosovës me vizitën e tyre në Mitrovicë. Përzurja poshtëruese nga një grup huliganësh serb në veri, e dëshmoi se Vjosa Osmani është e padenjë për atë pozicion.
Vegëza e artikullit të publikuar në portalin e dyshimtë “newsonline48h.com”:
Më poshtë mund të gjeni tekstin autentik të publikuar nga PDK në faqen e tyre zyrtare në Facebook.
https://www.facebook.com/PDKqender/posts/3724798947566124
Analiza:
Portali i dyshimtë “newsonline48h.com” ka marrë një pjesë të tekstit nga reagimi PDK-së, të cilit i ka vënë titull të sajuar, duke pretenduar rrejshëm se atë e ka thënë diplomati amerikan William Walker. Pas verifikimit nga hibrid.info, rezulton që ky artikull kategorizohet si “lajm i rremë” dhe “dezinformatë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.