Portali informativ “Kosova-sot.info” ka publikuar dje (8 janar) një artikull me titull “Zbulohet shkaku i vdekjeve të familjes me 8 anëtarë”.
Pas verifikimit të fakteve të kryer nga hibrid.info, rezulton që titulli i këtij artikulli nuk e bënë të qartë lajmin dhe vendndodhjen e kësaj ngjarje.
Lajmi qartësohet vetëm në përmbajtje, ku thuhet se “Në Utah, SHBA u gjetën të pajetë 8 anëtarë të një familje: 3 të rritur dhe 5 fëmijë.”.
Përveç titullit që nuk sqaron vendndodhjen e ngjarjes, edhe fotografia e vendosur në këtë artikull nuk i përgjigjet përmbajtjes, pasi në të shihet shiriti i policisë në të cilin shkruan shqip “SKENE KRIMI MOS KALO”, që lë të kuptohet se ngjarja ka ndodhur në ndonjë vend shqipfolës.
Duke e ditur se ky portal informativ është i regjistruar në Kosovë (shih këtu) dhe shumicën e lexuesve i ka shqipfolës (shih këtu), kjo mund t’i dezinformojë lexuesit se ngjarja ka ndodhur në Kosovë.
Pjesë nga artikulli i publikuar në portalin “Kosova-sot.info”:
Në Utah, SHBA u gjetën të pajetë 8 anëtarë të një familje: 3 të rritur dhe 5 fëmijë.
Policia kërkoi 24 orë kohë për zbardhjen e ngjarjes dhe në deklaratën e sotme zbulon se ishte kryefamiljari që i Mori jetën gruas, vjehrrës dhe 5 fëmijëve. Në fund vrau edhe veten.
Fëmijë ishin të moshave: 17, 12, 7, 7 dhe 4 vjeç.
Vegëza e artikullit të publikuar në portalin “Kosova-sot.info”:
Për ta vërtetuar edhe më shumë faktin se ngjarja ka ndodhur në shtetin Utah të SHBA-ve, hibrid.info ka gjetur artikullin e publikuar në disa mediume të huaja si “CBSNews.com” dhe “Independent.co.uk”.
Analiza:
Në titullin e artikullit të publikuar nga “Kosova-sot.info” nuk sqarohet se në cilin shtet ka ndodhur kjo ngjarje, ndërsa lajmi qartësohet vetëm në përmbajtje, ku bëhet e ditur se rasti në fjalë ka ndodhur në shtetin Utah të SHBA-ve.
Ky portal informativ i cili vepron në Kosovë dhe lexuesit parësor i ka nga Kosova, bazuar në përcjellësit e faqes në Facebook. Prandaj, mosdhënia e informacioneve për vendin se për ku bëhet fjalë, ky lajm shumë lehtë mund t’i dezinformojë lexuesit e vet, duke i bërë të mendojnë se ngjarja ka ndodhur në Kosovë.
Bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.