Portali informativ Veriu.info ka publikuar në faqen e tij zyrtare në Facebook një fotografi me pretendimin se në të paraqiten minatorët e Trepçës në horizontin e nëntë, në thellësi mbi 800 metra.
Pas kontrollit të fakteve të kryer nga hibrid.info, është vërtetuar se fotografia nuk paraqet minatorët e Trepçës, por se ajo është realizuar në minierën “Stara Jama” në Zenicë të Bosnje e Hercegovinës.
Vegëza e postimit të publikuar në Facebook nga faqja e portalit “Veriu.info”:
https://archive.is/sjqbK#selection-467.0-467.162
Pas hulumtimit përmes programit të automatizuar online “InVID”, hibrid.info ka gjetur fotografinë e njëjtë të publikuar në platformën online për fotografi “Alamy”, e cila tregon datën e publikimit 15 korrik 2015, dhe që është shkrepur nga fotografi Dado Ruvic.
Imazhi mban përshkrimin “Minatorët e qymyrit luten ndërsa agjërojnë gjatë muajit të shenjtë të Ramazanit, 740 metra (2427 këmbë) thellë brenda minierës së qymyrit Stara Jama, në Zenicë, Bosnje dhe Hercegovinë, 15 korrik 2015”. (shih fotografinë më poshtë)
Fotografia e njëjtë është gjetur e publikuar edhe në mediumin britanik “TheGuardian.com” në përshkrimin e së cilës sqarohet se pamjet tregojnë minatorët në Bosnje e Hercegovinë. (shih këtu)
Screenshot nga artikulli i publikuar në TheGuardian
Edhe gjatë vitit të kaluar, e njëjta fotografi ishte publikuar nga një portal tjetër në Kosovë, me pretendimin se pamjet shfaqin minatorët e Trepçës. Kjo përmbajtje po ashtu ishte verifikuar nga hibrid.info. (shih këtu)
Analiza:
Në bazë të kontrollit të fakteve, hibrid.info ka vërtetuar se portali “Veriu.info” ka publikuar në Facebook një fotografi të minatorëve në Bosnje e Hercegovinë, me pretendimin se në të paraqiten minatorët e Trepçës gjatë ngrënies së syfyrit në një thellësi mbi 800 metra.
Bazuar në metodologjinë e punës, hibrid.info e vlerëson këtë postim të portalit “Veriu.info” si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.