Shkroi: Fatbardh Dema
Nëpërmjet një postimi në median sociale TikTok janë publikuar shifra që pretendohet të jenë nga një sondazh për zgjedhjet e ardhshme në Kosovë.
Publikimi është bërë nga llogaria me emrin “mezatarum” më 13 qershor.
Në këtë postim paraqiten përqindjet e 5 subjekteve politike. Lëvizja Vetëvendosje 82%, Partia Demokratike e Kosovës 7%, Lidhja Demokratike e Kosovës 5%, Aleanca për Ardhmërinë e Kosovës 4% dhe NISMA 2%.
Çka nuk shkon me këtë publikim?
Pas hulumtimit nga hibrid.info nëpërmjet makinave online të kërkimit rezulton se për shifrat e publikuara në fotografinë e postuar nuk ka pasur ndonjë raportim kohëve të fundit (shih këtu).
Vegëza e publikimit të llogarisë “mezatarum” në TikTok:
Postimi deri në publikimin e këtij artikulli ka marrë mbi 2 mijë shikime, mbi 94 pëlqime dhe 18 komente. (shih këtu)
Sondazhi i fundit i kryer për zgjedhjet në Kosovë, ishte publikuar 25 qershor. Mediumi online Reporteri.net pati publikuar të dhëna që kishte raportuar se i ka siguruar nga një sondazh i “UBO Consulting”. (shih këtu)
Shifrat ishin ndryshe nga ato për të cilat pretendohet në postimin e llogarisë “mezatarum” në TikTok. Sipas publikimit të 25 qershorit, Lëvizja Vetëvendosje printe me 49.6%, Partia Demokratike e Kosovës kishte 17.0%, Lidhja Demokratike e Kosovës 15.5% dhe Aleanca për Ardhmërinë e Kosovës – NISMA 8.6%.
Te sondazhi i UBO Consulting kanë qenë 1065 respondentë dhe margjina e gabimit ishte plus-minus 3%, sipas publikimit të “Reporteri.net”. Ndërsa në publikimin nga llogaria “mezatarum” në TikTok, s’ka asnjë detaj të tillë.
Analiza:
Llogaria “mezatarum” ka publikuar një imazh në TikTok, përmes së cilit paraqiten shifra në përqindje për subjektet politike për zgjedhjet e ardhshme në Kosovë.
Pas verifikimit nga hibrid.info, del se për këto shifra s’ka pasur raportim kohëve të fundit.
Bazuar në metodologjinë e punës, hibrid.info e vlerëson këtë pretendim si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.